|
Լուրեր
|
|
 2017 թվականի նոյեմբերի 26-ին, Թբիլիսիի Սուրբ Գևորգ առաջնորդանիստ, Հավլաբարի Սուրբ Էջմիածին, Բաթումի «Սուրբ Փրկիչ» եկեղեցիներում, հավարտ կիրակնօրյա Սուրբ և Անմահ Պատարագի, քահանայաց դասի կողմից կատարվեց հոգեհանգստյան արարողություն՝ Թբիլիսիում նոյեմբերի 22-ին, իրականացված հատուկ գործողության արդյունքում զոհված Վրաստանի Անվտանգության հատուկ ծառայության ջոկատային Վանո Գոլոշվիլիի և նոյեմբերի 25-ին Բաթումիի Լեո-գրանդ հյուրանոցում ծագած հրդեհին զոհ դարձած 11 քաղաքացիների հոգու խաղաղության համար:
Հավատացյալները աղոթք բարձրացրին և մոմեր վառեցին անմեղ զոհերի հիշատակին:
Հավարտ եկեղեցական արարողության, Բաթումիի Սուրբ Փրկիչ եկեղեցու հոգևոր հովիվ Տեր Արարատ քահանա Գումբալյանի գլխավորությամբ հավատացյալների, Ալեքսանդր Մանթաշյանց կենտրոնի պաշտոնեության և ուսուցիչների խումբը այցելեց Լեո-գրանդ հյուրանոցի տարածք: Հոգևոր հայրը՝ հանուն Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի, հոգևոր դասի, առաջնորդարանի պաշտոնեության և Ալեքսանդր Մանթաշյանց կենտրոնի աշխատակազմի ցավակցություն հայտնեց զոհվածների հարազատներին, կիսելով վրաց ժողովրդի վիշտը:
Այցելուները ծաղիկներ խոնարհեցին և մոմեր վառեցին անմեղ զոհերի հիշատակին:
|
