|
Թբիլիսիի թիվ 104 հանրային դպրոցը (տնօրեն Իրինա Ժամկոչյան) հարուստ պատմություն և գեղեցիկ ավանդույթներ ունեցող Վրաստանի հայերեն ուսուցմամբ կրթօջախներից մեկն է: Մայրենի լեզվով ուսումնառությունը և հայեցի դաստիարակությունն այս դպրոցի, որը նաև հայտնի է Վանքի դպրոց պատվավոր անունով, գործունեության առաջնահերթությունն է, իսկ դպրոցին աշակերտելը՝ պատվի և հպարտության գործ:
Արդեն երկու տարի անընդմեջ ուսումնական տարվա մեկնարկից մի քանի ամիս անց դպրոցի աշակերտական ինքնավարության խորհուրդը, դպրոցի տնօրինության գլխավորությամբ, ելնելով առաջին դասարանցիների առաջադիմությունից և օրինակելի վարքից, նրանց շնորհում է թիվ 104 դպրոցի աշակերտի կարգավիճակ:
Այդ ուսանելի ավանդույթին էր նվիրված 2015 թվականի նոյեմբերի 3-ին, թիվ 104 դպրոցում կայացած հանդիսությունը, որտեղ առաջինդասարանցիներն երգեցին կրթօջախի օրհներգը, հանդես եկան արտասանությամբ, երգով, պարով, նաև բեմականացումներով, արժանանալով հյուրերի, ուսուցիչների և ծնողների ծափողջույններին: Աշակերտների ստացած գիտելիքների, ձևավորված վարքի վերաբերյալ խոսք ասացին Վրաստանում ՀՀ դեսպանության մշակույթի գծով կցորդ Էլինա Մկրտչյանը, «Վրաստան» թերթի խմբագիր Վան Բայբուրթյանը, դպրոցի տնօրեն Իրինա Ժամկոչյանը և մյուսները:
Վերջում օրհնության և գնահատանքի խոսքով հանդես եկավ Վիրահայոց թեմի Մառնեուլիի շրջանի հայկական համայնքների հոգևոր հովիվ Տեր Խորեն վարդապետ Հովհաննիսյանը: Հոգեշնորհ Հայր Սուրբը փոխանցեց Վիրահայոց թեմի առաջնորդի սերը և գնահատանքը դպրոցի տնօրինությանը, ծնողներին և աշակերտությանը: Հայր Սուրբն իր խոսքում անդրադարձ կատարեց հայկական դպրոցի և հայոց լեզվի իմացության կարևորությանը, ի մասնավորի ասելով. «Մեր մեծագույն հարստություններից մեկը մեր մայրենին է: Մեր հայրերը մեր սրբություններին ավելացրել են մայր բառը՝ Մայր Աթոռ Սուրբ Էջմիածին, Մայր Եկեղեցի, Մայր Հայրենիք, Մայր Արաքս, Մայր Տաճար և վերջապես մայրենի լեզու: Մեր ժողովուրդն առանձնահատուկ վերաբերմունք ունի ոսկեղենիկ հայերենի նկատմամբ, որը պետք է գիտակցել ու հպարտանալ: Հայր Խորենը հորդորեց աշակերտներին և ծնողներին հավատարիմ լինել Մեսրոպ Մաշտոցի թողած սուրբ ժառանգությանը և իր խոսքն ավարտեց Գարեգին Ա լուսահոգի Վեհափառ Հայրապետի խոսքերով՝ «Մեր լեզուն ճանապարհ է դեպի հավերժություն, գրավական մեր ինքնության, Նոյան տապան մեր փրկության»:
Դպրոցի աշակերտական ինքնավարության խորհրդի անդամները առաջին դասարանցիներին հանձնեցին աշակերտական հավաստագրեր և պատգամեցին պատվով ու հպարտությամբ կրել Թբիլիսիի թիվ 104 հանրային դպրոցի աշակերտի անունը:
|
