Ընթացիկ տարվա դեկտեմբերի 14-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ երեկո՝ նվիրված հոգևոր և աշխարհիկ կյանքում հայ կնոջ դերակատարությանը: Միջոցառումը նախաձեռնել էր Վրաստանի հայ կանանց «Շուշանիկ» միությունը՝ Վիրահայոց թեմի հոգևոր դասի հետ համագործակցությամբ: Երեկոյին ներկա էր Վրաստանում ՀՀ արտակարգ և լիազոր դեսպան Յուրի Վարդանյանի կինը՝ տիկին Էլիոնորա Վարդանյանը:

Բացելով երեկոն՝ Վրաստանի հայ կանանց «Շուշանիկ» միության նախագահ Սուսաննա Խաչատրյանը արժևորեց հայ կնոջ դերը հավատքի և հայրենիքի համար պայքարի առաջնագծում, ընդգծելով, որ այսօր էլ հայ կինը շարունակում է հավատարիմ մնալ իր Եկեղեցուն, իր լեզվին, իր ազգին:

Միջոցառմանը ներկա Վիրահայոց թեմի հոգևոր ծառայող Տեր Մանուկ քահանա Զեյնալյանը հետաքրքիր ու բովանդակալից խոսքով ներկայացրեց քրիստոնյա հավատքին սուրբ կույսեր Գայանեին և Հռիփսիմեին, նրանց նվիրվածությունն և նահատակությունը: Իսկ Թբիլիսիի Սուրբ Էջմիածին եկեղեցու հոգևոր հովիվ Տեր Սամվել քահանա Թորոսյանը խոսեց Սուրբ Շուշանիկի վարքի մասին, կարևորելով նրա դերը երկու քրիստոնյա ազգերի կյանքում: Տեր Հայրը գնահատանքի խոսքեր ուղղեց նաև միջոցառման նախաձեռնող համանուն կազմակերպությանը:

Հայ ժողովրդի պատմության բոլոր դարաշրջաններում կնոջ հայրենանվիրության մասին բանախոսեց Թբիլիսիի պետական համալսարանի ուսանողուհի Անժելլա Սարոյանը: Ներկաները հետաքրքրությամբ լսեցին հերոսական Սոսե Մայրիկի, առաջին հայ դիվանագետ կնոջ՝ Դիանա Աբգարի, առաջին արևմտահայ կին գրող Զապել Եսայանի և Արցախյան պատերազմում հայ կին հրամանատար Անահիտ Մարտիրոսյանի մասին:

Երեկոն հոգեթով երգերի հիասքանչ կատարումներով գեղեցկացրեց Սուրբ Էջմիածին եկեղեցու երգչախումբը՝ խմբավար Սվետլանա Տատոևի գլխավորությամբ և Կարեն Միրզոյանի նվագակցությամբ:

Երեկոն դարձավ հայ կնոջ մեծարմանը նվիրված գողտրիկ միջոցառում: