2014 թվականի նոյեմբերի 8-ին, Թբիլիսիի Գարի Դավթյան տիկնիկային մշակույթի տանը կայացավ սիրված դերասան և գրող Գևորգ Հովակիմյանի գրական-ստեղծագործական երեկոն: Տիկնիկների հարևանությամբ տեղեր էին զբաղեցրել այս օրերին Քարվանսլայում կազմակերպված «Արտիստերիում 7/2014» ցուցահանդեսի շրջանակներում Թբիլիսի ժամանած ավանգարդ արվեստի հայ գործիչները, ովքեր մասնակից 15 այլ երկրների շրջանում ցուցահանդեսին ներկայացնում էին Հայաստանը: Ներկա էին նաև Լիտվայից ժամանած հյուրեր:

Ներկաներին ողջունեց և օրվա բանախոսին ներկայացրեց տիկնիկային մշակույթի կենտրոնի ղեկավար տիկին Ժաննա Դավթյանը: Այնուհետև Գևորգ Հովակիմյանը, որին թբիլիսահայ հանդիսատեսը հիշում է Պետրոս Ադամյանի անվան թատրոնի բեմահարթակում կերպավորած տարբեր դերերից, ներկաների առջև կանգնեց գրողի ամպլուայով: Նա ընթերցեց իր «Ջիբգիրը» պատմվածքը, որը չծնված, դեռևս մոր արգանդում գտնվող սաղմի հոգեբանական երկխոսությունն է : Պատմվածքի գլխավոր նպատակը հղիության արհեստական դադարեցումը, ձևավորվող սաղմի դեմ մարդասպանության կանխումն է, որ արտահայտվել էր արտաքին աշխարհի հետ կապ ունեցող սաղմի արգանդային երկխոսությամբ:

Իրենց խոսսքում բանաստեղծ-թարգմանիչ Գիվի Շահնազարը, Վրաստանի հայ նկարիչների միության նախագահ Մերուժան Շահումյանը, «Վրաստան» թերթի խմբագիր Վան Բայբուրթյանը, Թեմի հոգաբարձուների խորհրդի անդամ Սամվել Աղեկյանը բարձր գնահատեցին գրողի գեղարվեստական աշխատանքը, արժևորեցին Գևորգ Հովակիմյանին ոչ միայն որպես ճանաչված դերասանի, այլև որպես արդիական հոգեբանական ժանրի ստեղծագործողի: Խորհրդանշական էր, որ չծնված երեխաների բողոքի երկխոսությունը տեղի էր ունենում երջանկահիշատակ վարպետ Գարիի ստեղծած տիկնիկների միջավայրում, որոնք ակամայից դարձել էին գրական ստեղծագործության «ունկնդիրները»:

Վերջում օրհնության և գնահատանքի խոսքով հանդես եկավ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը:

Ներկաների կողմից առաջարկ եղավ գրական ստեղծագործությունը վերածել սցենարի և պատրաստել կարճամետրաժ ֆիլմ, որը կոչ կլինի հայ ժողովրդին՝ լուծելու հայության ժողովրդագրական խնդիրը: