ՀՀ կրթության և գիտության նախարարության և ՀՀ Սփյուռքի նախարարության հովանու ներքո քաղաքամայր Երևանում և Ծաղկաձորում կազմակերպված Սփյուռք ամառային դպրոց ծրագրերին ակտիվորեն մասնակցեցին Վիրահայոց Թեմը և «Հայարտուն» կրթա-մշակութային կենտրոնը:

ՀՀ Կրթության և գիտության նախարարության կազմակերպած նախակրթարանի ուսուցիչների և դպրոցի տնօրենների մեկամսյա դասընթացներին ընդգրկված էին Վիրահայոց Թեմի «Հայարտուն» կրթա-մշակութային կենտրոնի Սբ. Մովսես Խորենացու անվան նախակրթարանի ուսուցչուհի Նարինե Ղուշչյանը և Վիրահայոց թեմի կրթական բաժնի ղեկավար Եվգենյա Մարկոսյանը: Ի թիվս Պարսկաստանից, Հոլանդիայից, Ֆրանսիայից, ԱՄՆ-ից, Ռուսաստանից և այլ երկրներից ժամանած հայապահպանության գործի նվիրյալների, նրանք ունկնդրեցին և քննարկեցին Լեզվի Ազգային ինստիտուտի հենքի վրա կազմակերպված տարբեր դասախոսություններ և սեմինարներ: Անշուշտ, իրազեկված նորույթները, հայապահպանությանն ուղղված հմտություները ուսուցիչները կկիրառեն ինչպես իրենց բնակության վայրերում գործող դաստիարակչական և կրթական կառույցների գործունեության ընթացքում, այնպես էլ վարժանքներվ կազմակերպելով ստացածը կփոխանցեց իրենց գործընկերներին:

ՀՀ Սփյուռքի նախարարության հովանու ներքո կազմակերպված «Սփյուռք» ամառային դպրոցին, որը գործում էր գեղատեսիլ Ծաղկաձորում, մասնակցում էին Վիրահայոց թեմի «Հայարտուն» կենտրոնի հայերենի ուսուցման շաբաթօրյա և կիրակնօրյա վարժարանների ուսուցչուհիներ Թամարա Գաբոյանը, Ռոզա Զոհրաբյանը, Բաթումի կիրակնօրյա դպրոցից Դիանա Հակոբյանը, Գայանե Վարդանյանը, Ռուզաննա Օվանեսյանը, Քոբուլեթից՝ Դիանա Քեյանը և «Հայարտուն» կենտրոնի հոգևոր տեսուչ Գևորգ սարկավագ Անտոնյանը: ԵՊՀ միջազգային կրթական կենտրոնի հիման վրա կազմակերպված «Սփյուռք» ամառային դպրոցի տարբեր խմբերի կազմում նրանք հնարավորություն ունեցան ունկնդրելու դասախոսություններ հայապահպանությանը և հայրենաճանաչությանն ուղղված տարբեր տեսանկյունների շուրջ, ընդորում՝ հայերենի ուսուցման մեկօրյա դպրոցների ծրագրերի, հայրենասիրական և ազգագրական երգերի ու պարերի ուսուցման, Հայ ժողովրդի և Հայոց Եկեղեցու պատմության թեմաներով:

Վիրահայոց Թեմը և «Հայարտուն» կենտրոնը բարձր են գնահատում ՀՀ կրթության և գիտության և Սփյուռքի նախարարությունների սփյուռքահայության նկատմամբ ցուցաբերած բարյացակամ և հոգատար վերաբերմունքը և երախտագիտության խոսքեր ուղղում ազգապահպան այս գերատեսչություններին՝ Թեմի և Կենտրոնի նախակրթարանին և հայերենի ուսուցման երկու գործող վարժարաններին անհրաժեշտ ձեռնարկներով ապահովելու համար: Դա, անշուշտ կնպաստի Վիրահայ համայնքում շարունակելու Սփյուռքում հայոց լեզվի և ազգային մշակույթի պահպանմանը և խորացմանը ուղղված գործունեությունը: