Արդեն մի քանի օր չի դադարում մարդկանց հոսքը Վրաստանում Հայաստանի Հանրապետության  դեսպանություն, որտեղ  արժանավոր հայորդի,  աշխարհահռչակ շանսոնյե Շառլ Ազնավուրի  մահվան կապակցությամբ բացվել է  սգո մատյան:
 2018 թվականի հոկտեմբերի 5-ին, թբիլիսահայ հասարակայնության անդամները՝ ուսուցիչների, կառույցների ղեկավարների, ուսանողների, աշակերտների, Ազնավուրի  երգարվեստի երկրպագուների,  ազգի մեծ նվիրյալի գործունեության գնահատողների կազմով, Վիրահայոց թեմի երիտասարդական բաժնի (տնօրեն՝ Վալերի Բադալյան)  և «Հայարտուն» կենտրոնի (ղեկավար՝ Եվգենյա Մարկոսյան) նախաձեռնությամբ  այցելեցին Վրաստանում ՀՀ դեսպանություն:   Ազգի զավակի մեծ կորստի համար ցավակցական խոսքեր ուղղվեցին Վրաստանում ՀՀ արտակարգ և լիազոր դեսպան Ռուբեն Սադոյանին, որից հետո  Շառլ Ազնավուրի նկարի առջև  արժ. Տեր Մանուկ քահանա Զեյնալյանի կողմից կատարվեց հոգեհանգստյան կարգ: Սգո արարողությանը ներկա ժողովուրդը  մոմեր վառեց, ծաղիկներ խոնարհեց Մեծ հայի նկարի առջև,  ցավակցական գրառում կատարեց Սգո մատյանում: