|
 2018 թվականի մայիսի 18-ը, Վիրահայոց թեմի «Հովհաննես Թումանյանի տան» տիկնիկային թատրոնի համար ամրագրվեց Մեծ Լոռեցու «Բարեկենդանը» ներկայացման փակ դիտմամբ:
Թումանյանի տան հյուրընկալ սրահում տեղեր էին զբաղեցրել թեմի պաշտոնեությունը, «Սուրբ Մովսես Խորենացի» նախակրթարանի ավագ խմբի սաներն՝ իրենց ուսուցիչների հետ:
Միջոցառմանը իր օրհնաբեր ներկայությունն էր բերել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը՝ ընկերակցությամբ Ախալքալաքի Կորխ գյուղից, ներկայումս ռուսաստանաբնակ Գեննադի Ղանդիլյանի և Ռաֆայել Եփրիկյանի:
«Հովհաննես Թումանյանի տան» ղեկավար Գիսանե Հովսեփյանը ողջույնի իր խոսքում կարևորեց այստեղ գործող տիկնիկային թատրոնի առաքելությունը՝ այն է փոքրիկներին ներկայացնել Մեծ Լոռեցու և ոչ միայն նրա ստեղծագործությունները տիկնիկների խաղով և խոսքով: Եվ հրավիրեց դիտելու «Բարեկենդանը» ներկայացումը:
Ու բացվեց տիկնիկային թատրոնի վարագույրը, ներկաներին հիացնելով այն գեղեցիկ, ճաշակով և մանրակրկիտ աշխատանքով, որ կատարվել էր բեմադրության ռեժիսոր Արմեն Հովհաննիսյանի ձեռքով՝ թումանյանական պոեմի բովանդակությանը, ժամանակի ոգուն և մթնոլորտին համահունչ տիկինիկներ պատրաստելու, նաև բեմական դեկորները ճիշտ և վարպետորեն ձևավորելու համար:
Թբիլիսիի Պետրոս Ադամյանի անվան թատրոնի դերասաններ Աշոտ Սիմոնյանի, Արեն Մկրտչյանի, Էդիտա Զոհրաբյանի և հիմնադիր Արմեն Հովհաննիսյանի կողմից տիկնիկների վարպետ խաղով, դերասանական ճիշտ շարժումներով, հնչեղ խոսքով ներկայացվեց միշտ արդիական «Բարեկենդանը» անջնջելի տպավորություն թողնելով ներկաների և հատկապես փոքրիկների վրա:
Ներկայացումից հետո բեմադրող-ռեժիսորը մեկնաբանեց պոեմի խորհուրդը՝ այն է ժողովրդական պարզամտությունը, մարդու նկատմամբ սերը և հավատը:
«Հովհաննես Թումանյանի տան» հոգևոր տեսուչ արժանապատիվ Տեր Կիրակոս քահանա Սիմոնյանը բարձր գնահատեց տիկնիկագործի իրականացրած ստեղծագործական մեծ աշխատանքը՝ դա է տիկնիկների և դեկորների ստեղծումը, երաժշտական ձևավորումը, լույսի համադրումը: Այդ ամենը ներկայացումը դարձնում է բարձրարժեք, արհեստավարժության տեսանկյունից գնահատելի և շարժուն:
Ներկայացման մասին իր ամփոփիչ խոսքում Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը արժևորեց այն, որ դրանք թեև տևողությամբ երկար չեն, ընդամենը 15 րոպե, սակայն իրենց դաստիարակչական նշանակությամբ անգնահատելի են: Եթե մեծերին այդ ներկայացումները հիշեցնում են նրանց մանկության անվերադարձ ժամանակները, ապա փոքրերի համար դառնում են առաջընթաց քայլ դեպի կյանք, դեպի այդ կյանքի ճանաչողականություն: «Բարեկենդանը» ներկայացման դրվագները ըստ էության այդպիսին են. գյուղացի ամուսինների պարզամտությունը, միամտությունը և նաև վստահությունը, որ բխում է մարդու նկատմամբ ունեցած հավատից: Սրբազան հայրը կարևորեց նաև տիկնիկային թատրոնի դերը մանուկներին նախադպրոցական տարիքից սկսած մշակույթով դաստիարակության գործում:
Թեմակալ առաջնորդը գնահատանքի խոսքեր ուղղեց թատրոնի հիմնադիր Արմեն Հովհաննիսյանին, կենտրոնի ղեկավար Գիսանե Հովսեփյանին, տիկնիկային թատրոնի գործի մասնակիցներին և բոլոր կազմակերպիչներին: Հավարտ փակ դիտման տեղի ունեցավ թե՝ մանուկների և թե՝ մեծերի հյուրասիրություն Թումանյանի տան ավանդական պատշգամբում:
|
