|
 2018 թվականի ապրիլի 28-ին, Վիրահայոց թեմի Ռուսթավի քաղաքի Սուրբ Գրիգոր Նարեկացի հոգևոր, կրթա-մշակութային և երիտասարդական կենտրոնում կայացավ գողտրիկ միջոցառում «Իմ Հայաստանը» խորագրով:
Ուղիղ մեկ տարի առաջ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի օրհնությամբ ստեղծված կենտրոնի նպատակն է հոգևոր, մշակութային և պատմական ժառանգության պահպանումը, զարգացումը և տեղի հայ ազգաբնակչությանը եկեղեցու շուրջ համախմբումը:
Կենտրոնի գործունեության ուղենիշներից մեկը նաև ռուսթավցի երիտասարդներին համախմբելը, քրիստոնեական ոգով դաստիարակելը, հայրենական արժեքներին մերձեցնելը և ազգային ոգի ներշնչելն է: Այդ նպատակով գործում են կիրակնօրյա դպրոց, երգի և պարի խմբեր, երիտասարդական միություններ:
Պարբերաբար Թեմի երիտասարդական բաժնի կողից կազմակերպվող տեղի հայ երիտասարդների հետ հանդիպումները, դասախոսությունները և քննարկումները տալիս են իրենց դրական արդյունքը:
Քաղաքի թիվ 23 հանրային վրացական դպրոցի 11-րդ դասարանի աշակերտ, կենտրոնի սան Սերգո Զադոյանի նախաձեռնությամբ և ակտիվ երիտասարդների մասնակցությամբ կազմակերպված գեղեցիկ միջոցառման նպատակը՝ կենտրոնի սաներին և Ռուսթավի քաղաքի երիտասարդներին մայր հայրենիքը ներկայացնելն էր:
Միջոցառմանը ներկա էին երիտասարդներ,դպրոցականներ, ծնողներ, հյուրեր, Վիրահայոց թեմի պաշտոնյաներ: Իրենց սանի հրավերով դահլիճում տեղեր էին զբաղեցրել վրացերենի ուսուցչուհի Լելա Ախալաիան և դասղեկ Քեթևան Քաշիլաձեն, ինչպես նաև համադասարանցիները:
Միջոցառումը վարեցին նախագծի հեղինակը՝ համադասարանցի Նաթիա Թավաձեի հետ: Գրական-երաժշտական մոնտաժի մասնակիցները արձանագրեցին Հայաստան աշխարհի պատմության էջերը, աշխարհագրական դիրքը, հինավուրց տաճարները և եկեղեցիները, մայրաքաղաքներն ու մարզերը: Միջոցառումը խոսքով և տեսանյութով մի գեղեցիկ էքսկուրս էր մայր հայրենիքով՝ նրա անցյալի ոլորաններով, ներկա կյանքով և փառավոր ապագայի տեսիլքով:
Հնչեցին հայրենասիրական ոգեշունչ բանաստեղծություններ հայ պոեզիայից, ներկայացվեց հայոց պարն ու մեղմանուշ երգը, միջոցառումը դարձնելով հիրավի մայր հայրենիքի նկատմամբ սիրո և հպարտության ոգեշնչում:
Միջոցառումն ամփոփեց հոգևոր կենտրոնի խնամատար արժանապատիվ Տեր Նարեկ քահանա Ղուշչյանը: Հոգևոր հայրը փոխանցեց Վիրահայոց թեմի առաջնորդի օրհնությունը և բարեմաղթանքը կենտրոնի սաներին ու ողջ անձնակազմին: Տեր Նարեկ քահանան բարձր գնահատեց երիտասարդների խմբի գործունեությունը, նրանց հոգում եղած ազգային ոգու արթնացումը, որը դրսևորվեց հայերեն խոսքով, երգով, պարով և հայրենիքի նկատմամբ սիրով ու հպարտությամբ: Հոգևոր հայրը գնահատանքի խոսքեր ուղղեց Սուրբ Գրիգոր Նարեկացի հոգևոր կենտրոնի աշխատակազմին, սաներին ու նրանց ծնողներին, ում համար կենտրոնը դարձել է հայրենական տուն, համախմբող կենտրոն, նաև Հայոց Եկեղեցու և հայեցի դաստիարակության օջախ:
Նախաձեռնությունից և գեղեցիկ միջոցառումից ստացած տպավորությունները կիսեցին և իրենց գոհունակությունը արտահայտեցին ներկա գտնվողները:
|
