2018 թվականի փետրվարի 11-ին, Բուն Բարեկենդանը հարիսայի փառատոնով նշվեց Վիրահայոց թեմի Ռուսթավի քաղաքի Սուրբ Գրիգոր Նարեկացի հոգևոր, կրթա-մշակութային և երիտասարդության կենտրոնում: Թբիլիսիի «Հայարտուն» կենտրոնից հետո Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը հյուրընկալվեց Ռուսթավիում: Կենտրոնի սովորողների մասնակցությամբ ներկայացվեց Հովհաննես Թումանյանի «Բարեկենդան»ը:

Վիրահայոց թեմի առաջնորդը, շնորհավորեց Բուն Բարեկենդանի տոնի կապակցությամբ, խոսեց օրվա խորհրդի մասին և մաղթեց հոգեպես զորացած անցնել Մեծ Պահքի ժամանակաշրջանը: Թեմակալ առաջնորդը օրհնեց հարիսայով լի կաթսաները և հրավիրեց հյուրասիրության:

Բուն Բարեկենդանը տոնականորեն նշվեց նաև Վիրահայոց թեմի Բաթումի Սուրբ Փրկիչ եկեղեցում: Թեմի Ալեքսանդր Մանթաշյանց կրթա-մշակութային և երիտասարդության կենտրոնը կազմակերպել էր հարիսայի փառատոն: Հարիսայի փառատոնին ներկա էր Աջարիայում, Գուրիայում և Իմերեթիում ՀՀ Գլխավոր հյուպատոս Եղիշե Սարգսյանը՝ տիկնոջ հետ: Բուն Բարեկենդանի հյուրասիրությունն ուղեկցվեց տեղի ստեղծագործական խմբերի ուրախ երգ ու պարով:

Օրը տոնական էր նաև Ախալցիխեի Սուրբ Գրիգոր Լուսավորիչ եկեղեցում: Հավարտ Սուրբ Պատարագի օրհնվեցին հավատացյալ կանանց ձեռքով պատրաստած հարիսայով կաթսաները և կճուճները և բաժանվեց ժողովրդին, բաժին հասցնելով նաև ծերերին և հիվանդներին:

Իսկ նախորդ օրը, փետրվարի 10-ին հարիսայի փառատոններ տեղի ունեցան Շահումյան ավանում և Կարմիր գյուղում: Մառնեուլի շրջանի Շահումյանի Սուրբ Աստվածածին և Կարմիր գյուղի Սուրբ Ավետարանչաց եկեղեցիներում առավոտյան և երեկոյան ժամերգությունից հետո տեղի ունեցավ հարիսայով հյուրասիրություն և տոնահանդես:

Երկու գյուղերում էլ տոնի առթիվ տեղացիներին շնորհաvորելու էին ժամանել Վրաստանում ՀՀ դեսպանության առաջին քարտուղար Արթուր Սարգսյանը և խորհրդական Արտակ Գրաբսկին, թեմի պաշտոնեության ներկայացուցիչները: Ամենուրեք մինչև ուշ շարունակվեց տոնահանդեսը: