Ընթացիկ տարվա դեկտեմբերի 24-ին Վրաստանի վարչապետ Իրակլի Ղարիբաշվիլին հանդիպեց Վրաստանում գործող չորս կրոնական համայնքների՝ հայ առաքելական և կաթոլիկական Եկեղեցիների և մուսուլմանական ու հրեական թեմերի ղեկավարների հետ:

Վիրահայոց թեմը ներկայացնում էր թեմի առաջնորդ Գերաշնորհ Տեր Վազգեն եպիսկոպոս Միրզախանյանը:

Ողջունելով ներկաներին, վարչապետ Ղարիբաշվիլին նշեց, որ Խորհրդային Միության իշխանության ժամանակաշրջանում կրոնական համայնքներին հասցված վնասի մասնակի հատուցման նպատակով կառավարության որոշումը կատարված է: Կառավարության ղեկավարը հետաքրքրվեց կրոնական համայնքների ֆինանսավորման ընթացակարգով:

Հանդիպմանը ներկա կրոնական հարցերով պետական գործակալության ղեկավար Զազա Վաշախմաձեն ներկայացրեց համառոտ հաշվետվություն, ըստ որի պետության կողմից բոլոր չորս կրոնական համայնքների հետ ձևակերպված է պայմանագիր և բաշխված գումարները փոխանցված են նրանց հաշվեհամարներին:

Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը հայ հավատացյալների կողմից ողջունեց վարչապետին և գոհունակություն հայտնեց Վրաստանի իշխանություններին՝ վերջին ժամանակահատվածում կրոնական համայնքներին, այդ թվում նաև Վիրահայոց թեմին հուզող հարցերի նկատմամբ ուշադիր վերաբերմունքի համար:

Սրբազան Հայրը վարչապետի ուշադրությանը ներկայացրեց Վրաստանի խորհրդայնացումից առաջ երկրում գործող հայկական եկեղեցիները Թեմին վերադարձնելու հարցը, որոնց ամբողջական ցուցակը առաջնորդարանը ներկայացրել է կառավարությանը: Թեմակալ առաջնորդը բարձրացրեց նաև Վրաստանի հայ համայնքին և հավատացյալներին հուզող այլ հարցեր:

Վազգեն եպիսկոպոսը շնորհավորեց վարչապետ Ղարիբաշվիլուն գալիք նոր տարվա և Սուրբ Ծննդյան տոների առիթով և հրավիրեց հունվարի 6-ին մասնակցելու Սուրբ Ծննդյան և ջրօրհնեքի արարողությանը: