Սույն թվականի փետրվարի 23-ին, Վիրահայոց թեմի «Հայարտուն» կենտրոնի Գալուստ Գյուլբենկյան սրահում կայացավ հանդիպում Երևանի Խաչատուր Աբովյանի անվան պետական մանկավարժական համալսարանի մայրենիի ամբիոնի վարիչ, բանասիրական գիտությունների թեկնածու, դոցենտ Աշոտ Գալստյանի հետ: Հանդիպման նպատակն էր վիրահայությանը ծանոթացնել համալսարան ընդունելության 2014-2015 ուսումնական տարվա փաթեթին՝ առկա և հեռակա մասնագիտությունների գծով:

Դահլիճում տեղ էին գտել թբիլիսահայ երիտասարդներ, ծնողներ, ուսուցիչներ, ապագա դիմորդներ, դպրոցների բարձր դասարանների աշակերտներ:

Պարոն Գալստյանը ներկաներին մանրամասն ներկայացրեց այն նորամուծությունները, որ կատարվելու են Երևանի Խաչատուր Աբովյանի անվան պետական մանկավարժական համալսարանում այս տարվա ընդունելության ժամանակ: Տեղեկացրեց, որ մանկավարժական համալսարանը նոր ուսումնական տարվանից առկա և հեռակա ուսուցման հետ միասին մտցնում է նաև հեռավար ուսուցում, որը արտասահմանյան երկրներում փորձված և արդարացված մեթոդ է և հնարավորություն է տալիս երիտասարդին օնլայն ճանապարհով ստանալ բարձրագույն կրթություն: Նորույթը մտցվում է համալսարանի բոլոր ֆակուլտետներում և հետապնդում է Սփյուռքում ազգայինը պահպանելու նպատակ:

Դոցենտ Աշոտ Գալստյանը սիրով պատասխանեց ներկաներին հետաքրքրող բոլոր հարցերին: Սփյուռքում հայեցի դաստիարակությանը նպատակամղված մանկավարժական բարձրագույն կրթության նորույթը ընդունվեց մեծ ոգևորությամբ: