Հոկտեմբերի 11-ին, Հայ Առաքելական Սուրբ Եկեղեցու Վիրահայոց թեմի «Հայարտուն» կենտրոնի աջակցությամբ և ՀՀ Մշակույթի նախարարության հովանավորությամբ, Թբիլիսիի Վանո Սարաջիշվիլու անվան պետական կոնսերվատորիայի փոքր դահլիճում կայացավ Թբիլիսիի նախկին բնակիչ, այժմ Գերմանիայում ապրող և ստեղծագործող Մամիկոն Նահապետովի դաշնամուրային երաժշտության համերգը: Համերգը դարձավ Հայոց Եկեղեցու նվիրական տոներից մեկին՝ Թարգմանչաց տոնին նվիրված միջոցառումների շարքի առաջնեկը:

Մամիկոն Նահապետովի վաղեմի երազանքն էր արհեստավարժ համերգով հանդես գալ իր հայրենակիցների, թբիլիսահայ համայնքի առջև, նրանց առջև, ովքեր հավատացել են նրա աշխատասիրությանն ու ընդունակություններին, աջակցել ու ոգևորել են և դարձել նրա կատարողական արվեստի երկրպագուները:

Լեփ-լեցուն դահլիճում, որտեղ տեղ էր գտել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը, ներկա էին կոնսերվատորիայի դասախոսներ և ուսանողներ, երաժշտության մասնագետներ, թբիլիսահայ համայնքի ներկայացուցիչներ:

Դաշնամուրի ստեղնաշարի վ րա մատների աննկարագրելի շարժումներով տարածվեցին Արամ Խաչատրյանի, Շումանի, Բախ/Բուզոնի, Գաբունիայի, Բրամսի, Ստրավինսկի/Ագոստի անմահ ստեղծագործությունները: Երիտասարդ տաղանդավոր դաշնակահարն իր խոնարհումը բերելով Թեմակալ առաջնորդին, հատկապես հայ թարգմանիչների տոնին նվիրեց Առնո Բաբաջանյանի «Էքսպրոմտի» փայլուն կատարումը:

Վրաստանի հայ նկարիչների միության նախագահ Մերուժան Շահումյանը որպես այս անմոռաց երեկոյի գեղեցիկ հուշ, Մամիկոն Նահապետովին նվիրեց իր մանրանկարչական աշխատանքը: