Հունիսի 29-ին, Վիրահայոց թեմի «Հայարտուն» կենտրոնում կայացավ «Souvenirs” խորագրով գեղեցիկ միջոցառում: Այն նախաձեռնել էր Գարի Դավթյան տիկնիկային մշակույթի տունը: Միջոցառմանը ներկա էին առավելապես ռուսալեզու արվեստասեր հասարակայնության ներկայացուցիչներ:

Վիրահայոց Թեմի առաջնորդ գերաշնորհ Տեր Վազգեն եպիսկոպոս Միրզախանյանի սուրբ օրհնությամբ մեկնարկած միջոցառումը միանգամայն գեղեցիկ և հոգեհմա անակնկալ էր հավաքված հասարակայնության համար: Ներկաները սպասում էին՝ տեսնելու արդեն ծանոթ Դավթյան ընտանիքի խամաճիկների հետաքրքիր խաղն ու պարը, որ այնպես վարպետորեն ուղեկցվում է համապատասխան երգ-երաժշությամբ: Սակայն հնչեց երաժշտությունը և ներկաների առջև հայտնվեց Գարի և Ժաննա Դավթյանների դուստր Աննա Դավթյանը, ով իր թավշյա ձայնով, անկրկնելի մեղեդայնությամբ վարպետորեն կատարեց 30-70-ական թվականների ֆրանսիական երաժշտության գլուխգործոցները: Նման արհեստավարժությամբ Աննայի գեղեցիկ կատարումները իսկական բացահայտում էր: Ներկաները մեկուկես ժամյա համերգի ընթացքում, ասես Ավետարանի ընթերցում, ունկնդրում էին Աննա Դավթյանի հիասքանչ երգը՝ վերապրելով կարոտախտի մեղմաշունչ զգացումները, ավագ սերնդի համար դառնալով երանելի ժամանակների գեղեցիկ հուշ, իսկ երիտասարդների համար՝ իսկական բացահայտում: Աննայի կատարումները զուգակցում էին երաժիշտ Վլադիմիր Ասատուրովի նույնքան գեղեցիկ կատարումներին:

Իր խորագրին համապատասխան միջոցառումը, որը վերածվեց իսկական բարձրաշխարհիկ երեկոյի, իրավամբ անակնկալ դարձավ Դավթյան ընտանիքին ճանաչող և իսկական արվեստը գնահատող հասարակայնության համար: Միջոցառման մտահղացումը, որ եկել էր երաժիշտ-լրագրող Կարինա Մեգերյան-Ժիզնևսկայայի և երաժիշտ Վլադիմիր Ասատուրովի կողմից, նպատակամղված էր՝ հասարակայնությանը ներկայացնելու Դավթյան ընտանիքն իր բոլոր սերունդներով. ծնողներ, զավակներ, թոռներ: Սպասենք մյուս անակնկալներին: