|
Լուրեր
|
|
2018թ. նոյեմբերի 27-ին Վիրահայոց թեմի Բաթումի Ալեքսանդր Մանթաշյանց կրթամշակութային և երիտասարդական կենտրոնի (ղեկավար՝ Սոնա Հովհաննիսյան) <<Սբ.Գրիգոր Լուսավորիչ>> նախակրթարանի ավագ խմբում անցկացվեց հետաքրքրություններով և անակնկալներով լի բաց դաս՝ նվիրված մաթեմատիկա, ավելի ճիշտ նախնական թվաբանություն առարկային:Այն կրում էր <<Ճանապարհորդություն դեպի մաթեմատիկական կղզիներ >> անվանումը: Ուսուցիչների և ծնողների ջանքերով դասաժամը ձևավորվել էր թեմային համապատասխան՝ սաների գեղեցիկ հագուստներ,գունագեղ թվեր ու պատկերներ: Գեղեցիկ դասասենյակին համահունչ էին նախակրթարանի սաների խելացի և մտածված պատասխանները: Արդյունքում դասաժամն ընթացավ հետաքրքիր և բովանդակալից,իսկ օրը դարձավ հիրավի տոնական:
Դասի ընթացքում երեխաները նավարկեցին փորձություններով լի մաթեմատիկական 5 կղզիներ, հեշտությամբ և արագ չորս լեզուներով (հայերեն,վրացերեն,ռուսերեն,անգլերեն) լուծեցին իրենց առաջադրված խնդիրները՝ հաշվեցին,անվանեցին երկրաչափական պատկերները,կատարեցին գումարման,հանման և համեմատման գործողություններ,տարբերեցին և խմբավորեցին առարկաները,ցուցադրեցին տարածության և ժամանակի մեջ կողմնորոշման մասին իրենց գիտելիքները,ոգևորությամբ պատասխանեցին ուսուցիչների կողմից տրված տրամաբանական հարցերին:
Դասը համեմված էր նաև գեղեցիկ երգերով և պարերով, որոնք էլ ավելի աշխույժ և շարժուն դարձրին այն: Բաց դասին ներկա էին ծնողները, ովքեր ուրախանում էին իրենց զավակների ճիշտ պատասխաններից և ոգևորվածություն ու հպարտություն զգում այն բանից, թե որքան շատ բան են սովորում իրենց զավակները մայրենի լեզվով այս նախակրթարանում:
|
