|
 2018 թվականի հուլիսի 3-ին, Վիրահայոց թեմի «Հովհաննես Թումանյանի տուն» գիտա-մշակութային կենտրոնում հյուրընկալվեց Մոսկվայից ժամանած «Դաշնամուրը ջազում» Ծննդյան համերգների և «Յաուզեի երաժշտական երեկոների» դիպլոմատ շնորհալի դաշնակահար, 10-ամյա Լուկա Փրանգիշվիլին՝ դաշնամուրի դասարանի ուսուցչուհի՝ Ռուսաստանյան և միջազգային բազմաթիվ մրցույթների դափնեկիր, վաստակաշատ դաշնակահարուհի Վալերիա Կուզնեցովայի հետ:
Նախկին թբիլիսաբնակ ծնողների որդի Լուկան թեև ծնվել և հասակ է առել Մոսկվայում, բայց իրեն այնուամենայնիվ համարում է «թբիլիսեցի»: Եվ պատահական չէ, որ Թբիլիսի ժամանելուն պես հարազատների նախաձեռնությամբ և իր ցանկությամբ այցելությունն էր Ամենայն Հայոց բանաստեղծի տուն և համերգն էր այս պոետաշունչ բնակարանում:
Դահլիճում էին թբիլիսահայ երաժշտասեր հասարակայնության ներկայացուցիչները, դաշնամուրային նվագի գնահատողները: Պատանի դաշնակահարի գողտրիկ համերգին իրենց պատվաբեր ներկայությունն էին բերել բանաստեղծ-թարգմանիչ Գիվի Շահնազարը, Վիրահայոց թեմի «Հովհաննես Թումանյանի տուն» գիտա-մշակութային կենտրոնի հոգևոր տեսուչ արժանապատիվ Տեր Կիրակոս քահանա Սիմոնյանը, թեմի պաշտոնեությունը:
Դեռահաս երաժիշտը հիացրեց ունկնդիրներին իր կատարումներով, նաև երգով, նրա ծրագրի մեջ մտնում էին Բարբարե Ծերեթելիի, Արամ Խաչատրյանի, Պյոտր Չայկովսկու, Վայնբերգի, Պոլ Մակկարտնիի և այլոց ստեղծագործություններից նմուշներ: Հիրավի ընդունակությունը, աշխատասիրությունը տվել էին իրենց արդյունքը, կատարողական վարպետությունը, բարձր տեխնիկան խոստումնալից էին, պատանուն կանխատեսելով լուսավոր ապագա:
Լուկա Փրանգիշվիլիի կատարողական արվեստով հիացած հանդիսատեսը ստացավ նաև ճանաչված դաշնակահարուհու, Վալերիա Կուզնեցովայի կատարումները լսելու հաճույքը: Հիասքանչ էին դաշնամուրի ստեղնաշարին նրա մատների հմուտ հպումով հնչող Շոպենի, Սկրյաբինի, Ալբենիսի, Ցինցաձեի և Տիմոֆեևի ստեղծագործություններից նմուշները, արժանանալով ներկաների բարձր գնահատականին:
Թերևս երաժիշտների համար ամենաբարձր գնահատականը երկնքից եկող Հովհաննես Թումանյանի տան օրհնությունն էր և կենտրոնի տնօրինության շնորհակալական գիրը, որ իրենց հետ Մոսկվա կտանեն շնորհաշատ աշակերտը և նրա վաստակաշատ ուսուցիչը:
|
