|
 2017 թվականի սեպտեմբերի 30-ին, Վիրահայոց թեմի եկեղեցիներում հավուր պատշաճի նշվեց Սուրբ Գևորգ քաջամարտիկ զորավարի տոնը: Այն նաև Սուրբ Գևորգ եկեղեցու ուխտի օրն էր:
Օրը առավել տոնական և հանդիսավոր էր Վիրահայոց թեմի Թբիլիսիի Սուրբ Գևորգ առաջնորդանիստ եկեղեցում: Հավատացյալները առանձնահատուկ սիրով եկել էին նորոգելու իրենց ուխտը և մասնակցելու տոնի առիթով եկեղեցում կատարվող արարողություններին: Մարդաշատ էր եկեղեցու բակն ու ներսը: Թբիլիսահայ հավատացյալներին միացել էին ուխտավորներ Հայաստանի Արմավիրի թեմի Խաթունարկ գյուղից, Իրանից, Կանադայից: Հավատացյալները ժամանել էին այս զորավոր տաճարում աղոթելու և քաջամարտիկ Սուրբ Գևորգի օրհնությունն ու շնորհները ստանալու փափագով:
Սուրբ Գևորգ եկեղեցում Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի օրհնությամբ Սուրբ և Անմահ Պատարագ մատուցեց Արմավիրի թեմի Խաթունարկ գյուղի Սուրբ Նշան եկեղեցու հոգևոր հովիվ արժանապատիվ Տեր Գևորգ քահանա Կրտիկաշյանը: Սուրբ Պատարագին ներկա էին Վրաստանում ՀՀ դեսպանության դիվանագետները, համայնքային գործիչներ, մտավորականներ, հյուրեր, զբոսաշրջիկներ:
Հընթացս Սուրբ Պատարագի, Տեր Գևորգ քահանան քարոզ խոսեց օրվա խորհրդի՝ քաջամարտիկ զորավարի քրիստոնյա հավատքին նվիրվածության և նահատակության մասին, արժևորեց թբիլիսահայերի մեծ սերն ու նվիրվածությունը Սրբին, որի անունով դարերի ընթացքում այստեղ կառուցվել են եկեղեցիներ, ընդորում առաջնորդանիստ Սուրբ Գևորգը, երախտագիտության խոսքեր ասաց Վիրահայոց թեմի առաջնորդի օրհնությանն արժանանալու համար:
Քարոզի վերջում պատարագիչ քահանան բոլոր Գևորգ անվանակիրներին շնորհավորեց տոնի կապակցությամբ, հորդորեց նրանց ապրել ամուր հավատքով և Քրիստոսի հավատարիմ զավակները լինելու հպարտությամբ:
Հավարտ Պատարագի, Սուրբ Գևորգ եկեղեցու հոգևոր հովիվ արժանապատիվ Տեր Սամվել քահանա Թորոսյանի կողմից օրհնվեց ուխտի մատաղը և բաժանվեց ժողովրդին: Տոնին նվիրված առաջնորդանիստ Սուրբ Գևորգի եկեղեցասեր կանանց միության նախաձեռնությամբ և խաչի քավոր Յուրի Երեմյանի աջակցությամբ կազմակերպվեց հյուրասիրություն:
Սուրբ Գևորգ տաճարը Թբիլիսիի հնագույն եկեղեցիներից է, այն կառուցվել է 13-րդ դարում, եղել է հայկական միջնադարյան հոգևոր, մշակութային և լուսավորչական կենտրոններից մեկը: Եկեղեցին դարեր ի վեր իր շուրջն է համախմբում վիրահայությանը, ի մասնավորի թբիլիսահայությանը:
|
