2016 թվականի օգոստոսի 14-ին, Հայ Առաքելական Սուրբ Եկեղեցին, մեծ շուքով նշեց Սբ. Աստվածածնի Վերափոխման տոնը: Հայոց Եկեղեցու հինգ Տաղավար տոներից չորրորդը և Տիրամորը նվիրված ամենահին տոնը հանդիսավորությամբ արժևորվեց նաև Վիրահայոց թեմի եկեղեցիներում:

Վաղ առավոտից բազմամարդ էին Թբիլիսիի Սուրբ Գևորգ առաջնորդանիստ և Հավլաբարի Սուրբ Էջմիածին եկեղեցիների բակն ու տաճարների ներսը: Եկեղեցիների խորանը զարդարվել էր օրվա խորհրդանիշ արևահամ խաղողի տեսակներով ու մրգով:

Առավոտյան ժամերգությունից հետո եկեղեցիներում կատարվեց Անդաստանի կարգ: Օրհնվեցին աշխարհի բոլոր ծագերը և ժողովուրդները:

Այնուհետև մատուցվեց Սուրբ Պատարագ: Առաջնորդանիստ Սուրբ Գևորգ եկեղեցում Պատարագիչն էր Վիրահայոց Թեմի առաջնորդ, Գերաշնորհ Տեր Վազգեն եպիսկոպոս Միրզախանյանը:

Տոնական Սուրբ Պատարագին ներկա էին բազում հավատացյալներ, վիրահայ հասարակայնության ներկայացուցիչներ, Վրաստանում Հայաստանի Հանրապետության դեսպանության դիվանագետներ: Ու չէր դադարում մարդկանց հոսքը դեպի եկեղեցի, որ գալիս էին խաղողի և տարբեր մրգերի գեղեցիկ զամբյուղներով, զարդարված սկուտեղներով՝ տարվա բերք ու բարիքի օրհնությունը և Բարձրյալի բարեխոսությունը ստանալու ակնկալիքով:

Հընթացս Սուրբ Պատարագի,Վազգեն եպիսկոպոսը հավուր պատշաճի քարոզ խոսեց օրվա խորհրդի մասին և տոնի առիթով շնորհավորեց հավատացյալներին:

Վիրահայոց թեմի առաջնորդը օրհնության և գնահատանքի խոսքեր ուղղեց Թբիլիսիի հայոց եկեղեցիների խաչքավորներ Յուրի Երեմյանին և Կարեն Սարգսյանին, փայտագործ Սամվել Պողոսյանին, եկեղեցիներին կից գործող տիկնանց միության անդամներին, ովքեր հիրավի տոնական էին դարձրել տաղավար տոնը:

Հոգևոր հայրերի կողմից ընթերցվեց Ներսես Շնորհալու աղոթքը նվիրված խաղողի օրհնությանը:

Եկեղեցիների Պատարագիչները հոգևոր դասի հետ միասին հանդիսավորապես կատարեցին ավանդական խաղողի և ողջ տարվա բերք ու բարիքի օրհնության կարգ:

Տոնական Սուրբ Պատարագներ մատուցվեցին և խաղողօրհնեքի կարգ կատարվեց նաև Սամցխե-Ջավախքի, Բաթումի, Քվեմո Քարթլիի և մյուս հայկական եկեղեցիներում:

Ախալքալաքի «Սուրբ խաչ» եկեղեցում Պատարագիչն էր Վիրահայոց Թեմի Սամցխե-Ջավախքի և Ծալկայի ընդհանուր առաջնորդական փոխանորդ հոգեշնորհ Տեր Բաբգէն վարդապետ Սալբիյանը: Պատարագին ներկա էին բազում հավատացյալներ և ճամբարականներ: Հոգեշնորհ Հայր Սուրբի մատուցած Պատարագը, հավուր պատշաճի քարոզը և կայացած խաղողօրհնեքի կարգը մեծ ոգևորություն և մխիթարություն բերեց տեղի ժողովրդին: Խաղողի օրհնությունից հետո եկեղեցու բակում ճամբարականների ուժերով տրվեց տոնական համերգ:

Տեղի համայնքներին նվիրական ծառայություն մատուցեցին Սամցխե Ջավախքի փոխանորդության քահանաները, ովքեր վաղ առավոտվանից ժամերգություններ և խաղողի օրհնության կարգ կատարեցին բազմաթիվ համայնքներում:

Բաթումի Սուրբ Փրկիչ եկեղեցում Սուրբ Աստվածամոր վերափոխման Սուրբ Պատարագին տեղի հավատացյալների հետ միասին ներկա էին նաև Հայաստանի Հանրապետությունից և այլ վայրերից ժամանած բազում հայեր և այլազգիներ: Խաղողի օրհնության կարգի ավարտից հետո Աջարիայի, Գուրիայի և Իմերեթիի հայության հոգևոր հովիվ Տեր Արարատ քահանա Գումբալյանի կողմից օրհնվեցին խաղողն ու միրգը և բաժանվեց ժողովրդին:

Երկուշաբթի առավոտյան Վիրահայոց թեմի բոլոր եկեղեցիներում կկատարվի հանգուցյալների հիշատակի Սբ. Պատարագ: