Հունիսի 2-ին, Գերմանիայի Հանրապետության Բունդեսթագի կողմից Հայոց ցեղասպանությունը ճանաչող բանաձևի ընդունման անմիջական արձագանքը Թբիլիսիում եղավ Վիրահայոց թեմի «Հայարտուն» կենտրոնի նախաձեռնությամբ շնորհակալության ֆլեշմոբի անցկացումը Վրաստանում Գերմանիայի Դաշնային Հանրապետության դեսպանության մոտ:

Հայաստանի Հանրապետության, Վրաստանի և Գերմանիայի Դաշնային Հանրապետության դրոշներով և չորս լեզուներով գրված «Շնորհակալություն», «Արդարությունը հաղթեց» թերթոններով ֆլեշմոբին մասնակցում էին Վիրահայոց թեմի աշխատակիցները, երիտասարդական բաժնի ակտիվիստները, «Վրաստանի Հայ Համայնք» հասարակական կազմակերպության անդամները, «Ալիքմեդիա» Վրաստանում հայկական լրատվական պորտալի ներկայացուցիչները, «Հայարտուն» կրթա-մշակութային և երիտասարդության կենտրոնի ստեղծագործական խմբերի ուսուցիչները, աշակերտները, ծնողները և բազում անհատներ: Հայերեն, վրացերեն, ռուսերեն և անգլերեն լեզուներով շնորհակալության խոսքով ելույթ ունեցան Վիրահայոց թեմի մշակույթի բաժնի տնօրեն, «Հայարտուն» կենտրոնի ղեկավար Լևոն Չիդիլյանը, Թեմի Երիտասարդական աշխատանքների համակարգող Նինա Սերոպովան, Իրավական հարցերի բաժնի տնօրեն Միքայել Ավագյանը, «Վրաստանի Հայ համայնք» կազմակերպության մամլո խոսնակ Սանդրո Օհանյանը, «Խաղաղության հիմնադրամի» նախագահ Գիորգի Թումասյանը: «Հայարտուն» կենտրոնի դուդուկի խմբի անդամները կատարեցին կոմիտասյան մեղեդիները:

Ֆլեշմոբի կազմակերպիչները դեսպանությանը փոխանցեցին շնորհակալության թերթոններ:

Վրաստանում Գերմանիայի Հանրապետության դեսպանին իր շնորհակալական նամակն է հղել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: