| Սրբոց Վարդանանց տոնը Վիրահայոց թեմում |
 |
 |
 |
|
2016 թվականի փետրվարի 4-ին, Թբիլիսիի Սուրբ Գևորգ առաջնորդանիստ եկեղեցում, հանդիսապետությամբ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի և ձեռամբ Քվեմո Քարթլիի հայկական համայնքների հոգևոր հովիվ Տեր Խորեն վարդապետ Հովհաննիսյանի, Սուրբ Վարդանանց զորավարների և 1036 վկաների հիշատակության օրվա առիթով մատուցվեց Սուրբ և Անմահ Պատարագ: Սա Սուրբ Վարդանանց հիշատակին նվիրված անդրանիկ Պատարագն էր, որ մատուցվեց վերակառուցված տաճարի Սրբոց Վարդանանց անունը կրող նորաօծ խորանին: Հոգեշնորհ Հայր Սուրբն իր քարոզ խոսքը սկսեց «Չգիտակցված մահը մահ է, գիտակցված մահը` անմահություն» պատմիչ Եղիշեի այս խոսքերով, որն Ավարայրի ճակատամարտից հետո գոյատևման ամենօրյա պայքարում հայերի համար դարձավ կարգախոս և ակնհայտորեն դրսևորվում է հայրենիքի սահմանների պահակակետին կանգնած զինվորների ծառայության մեջ: Պատարագիչ Հայր Սուրբը հավուր պատշաճի մեկնաբանեց օրվա խորհուրդը և հորդորեց հավատացյալներին հավատարիմ մնալ Սրբոց Ղևոնդյանց և Սրբոց Վարդանանց հիշատակին ու ժառանգությանը, պատրաստ լինել զոհաբերության, երբ այն վերաբերում է հավատքին և հայրենիքին: Հընթացս Սուրբ Պատարագի Առաջնորդ Սրբազան Հոր նախագահությամբ տեղի ունեցավ հոգեհանգստյան կարգ՝ «Վասն համօրէն ննջեցելոց ազգիս հայոց»: Սրբոց Վարդանանց տոնը նաև Ն.Ս.Օ.Տ.Տ. Ամենայն հայոց կաթողիկոս Գարեգին Բ-ի անվանակոչության օրն է, որի առիթով կատարվեց Հայրապետական մաղթանք: Միասնական աղոթք բարձրացվեց առ Աստված Ամենայն Հայոց Կաթողիկոսության անսասանության ու պայծառության և Վեհափառ Հայրապետի կենաց արևշատության: Օրհնելով ներկա հավատացյալներին և հոգևոր դասին, Վիրահայոց թեմի առաջնորդը անդրադարձ կատարեց ոգու ուժով ազատության հասնելու, հայրենիքը պահպանելու և հավատքին հավատարիմ մնալու գոյամաքառումներով տարած հաղթանակին: Սրբազան հայրը խոսեց վրաց ժողովրդի համար Վարդանանց պատերազմի նշանակության մասին,նշելով երկու հարևան ժողովուրդների՝ հայերի և վրացիների պայքարը հանուն հայրենիքի և ազատության Վարդան Մամիկոնյանի և Վախթանգ Գորգասալիի առաջնորդությամբ: Թեմակալ առաջնորդը բոլոր Վարդաններին շնորհավորեց իրենց անվանակոչության օրվա կապակցությամբ:
    |
