2015 թվականի մարտի 2-ին, Թբիլիսիում, Վիրահայոց թեմի «Հայարտուն» կենտրոնում, կայացավ Հայոց Ցեղասպանության 100-րդ տարելիցի միջոցառումները համակարգող տարածաշրջանային Վրաստանի հանձնախմբի հերթական նիստը՝ ընդլայնված կազմով:

Նիստի աշխատանքն իր ներկայությամբ պատվել էր Վրաստանում ՀՀ արտակարգ և լիազոր դեսպան պարոն Յուրի Վարդանյանը:

Ընդլայնված նիստը բացեց հանձնախմբի նախագահ, Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Սրբազան Հայրը հանձնախմբի անունից Վրաստանում ՀՀ դեսպան Յուրի Վարդանյանին և դեսպանատան ողջ անձնակազմին շնորհավորեց դիվանագետի օրվա առթիվ:

Հանձնախումբը քննարկեց ապրիլյան միջոցառումները մայր հայրենիքում և Վրաստանում, առաջիկա անելիքները ապրիլի 23-ին և 24-ին ծրագրված միջոցառումները Թբիլիսիում և հայաբնակ շրջաններում անհրաժեշտ պարագաներով ապահովելու հարցը:

Հանձնախմբի նախագահը հստակ ժամանակացույցով ներկայացրեց Վրաստանում, քույր եկեղեցիներում էկումենիկ աղոթքի և հիշատակի երեկոների անցկացումը, հայաբնակ շրջաններում Ցեղասպանության զոհերի հիշատակին խաչքարերի օծումը:

Կազմակերպվող միջոցառումների շարքում դասվեցին նաև Պետրոս Ադամյանի անվան հայպետդրամայի թատրոնի բեմադրությամբ Հիշատակի երեկոն, տեղերում Հայոց ցեղասպանությանը նվիրված ֆիլմերի ցուցադրությունը, Մեծ Եղեռնի զոհ մտավորականների հիշատակին մոմավառությունը, Հայոց Ցեղասպանության 100-րդ տարելիցին նվիրված «Վրաստան» թերթի հատուկ համարի հայերեն և վրացերեն հրատարակումը: Առաջարկվեց Թբիլիսիում հայ գրողների և հասարակական գործիչների Խոջիվանքի պանթեոնում կազմակերպել 100 տնկիների ծառատունկ:

Խոսվեց նաև այն մասին, որ Հայոց Ցեղասպանության 100-րդ տարելիցի համահայկական միջոցառումների առանցքային գաղափարաբանությունն են հանդիսանալու.

ա. Հիշողություն, հատուցում, դատապարտում,

բ. Երախտագիտություն այն պետություններին և ժողովուրդներին, ովքեր ապաստանեցին

փրկված հայությանը, և այն միջազգային կազմակերպություններին ու երկրներին, որոնք

դատապարտեցին թուրքական ոճրագործությունը,

գ. Պարտավորություն՝ հանդեպ սուրբ նահատակների,

դ . Վերածնունդ Մայր Հայրենիքի ու Արցախի և համահայկական ձեռքբերումների:

Առաջիկայում համացանցում կտեղադրվի Թբիլիսիում և շրջաններում իրականացվելիք միջոցառումների ճշգրտված ժամանակացույցը:

Նիստի աշխատանքն ամփոփեց Վրաստանում ՀՀ արտակարգ և լիազոր դեսպան Յուրի Վարդանյանը, կարևորելով հիշատակի միջոցառումների լայնամասշտաբ և ընդգրկուն իրականացումը:

Վրաստանի հանձնախմբի հաջորդ նիստը կանցկացվի մարտի 23-ին, Ջավախքում: