2014 թվականի նոյեմբերի 9-ին, Թբիլիսիում կայացավ «Գլախո՝ երկրորդ կյանք» տեսաերիզի շնորհանդեսը: Տեսաերիզը, որը պարունակում է հայ երգիչ, ՀՀ և Վրաստանի վաստակավոր արտիստ Գլախո Զաքարյանի 6 հայերեն և 6 վրացերեն երգերը, դարձավ կյանքից հեռացած արևելյան երգերի լավագույն կատարող, թբիլիսահայ ճանաչված երգիչ Գլախո Զաքարյանի իրավամբ երկրորդ ծնունդը:

Տեսաերիզը թողարկվել է Վրաստանում ՀՀ նախկին դեսպան, այժմ ՀՀ արդարադատության նախարար Հովհաննես Մանուկյանի հովանավորությամբ, ում համար Սայաթ-Նովայի երգերի կատարումը Գլախո Զաքարյանի կողմից եղել է իսկական բացահայտում:

«Գլախո՝ երկրորդ կյանք» տեսաերիզի շնորհանդեսը սկսվեց ՀՀ արդարադատության նախարարի և նրա հետ միասին Երևանից ժամանած հյուրերի, թբիլիսահայ հասարակայնության, «Հայարտուն» կենտրոնի դհոլի և դուդուկի խմբակների սաների և Գլախո Զաքարյանի հարազատների հետ երգչի շիրիմին ծաղիկներ խոնարհելով և խնկաբույր տարածելով: Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի գլխավորությամբ կատարվեց հոգեհանգստյան կարգ հանգուցյալի հոգու խաղաղության համար:

Այնուհետև միջոցառումը շարունակվեց Վրաստանի խորհրդարանի ազգային գրադարանի մեծ դահլիճում, որտեղ օրվա խորհրդին համապատասխան այլ նկարիչների հետ միասին ցուցադրվել էին ճանաչված գեղանկարիչ, թբիլիսյան կոլորիտի ստեղծման մեծավարպետ Թենգիզ Միկոյանցի կտավները:

Սերը Թբիլիսիի քաղաքային երգերի և սայաթնովյան մեղեդիների անզուգական կատարողի, հարգանքը իսկական թբիլիսեցի Գլախո Զաքարյանի հիշատակի առջև միջոցառման էր բերել քաղաքի բազմազգ հասարակությանը, երգիչ Գլախոյին հիշողներին և գնահատողներին:

Շնորհանդեսը սկսվեց Սայաթ-Նովայի «Դուն էն գլխեն..» երգի Գլախո Զաքարյանի կատարման ձայնագրությամբ և փոխանցվեց Գիորգի-Էլդար Շոշիտաշվիլու գլխավորությամբ «Քսովրելեբի» համույթին: Այնուհետև միմյանց հաջորդեցին Վիրահայոց թեմի «Հայարտուն» կենտրոնի անհատ կատարողներ Աննա Պողոսովայի, Նինա Կարապետյան-Գևորկովայի, Պետրոս Ադամյանի անվան հայպետդրամայի թատրոնի դերասաններ Ռոբերտ Հովհաննիսյանի, Ռոբերտ Աղաջանյանի, Սամվել Էլբակյանի, Հենրիխ Պետրոսյանի ասմունքը և երգը, «Հայարտուն» կենտրոնի դուդուկի (ուսուցիչ՝ Իվանե Մկրտչյան) և դհոլի (ուսուցիչ՝ Ռոբերտ Կաշավանիձե) դասարանների սաների ելույթները:

Սայաթ-Նովայի ստեղծագործությունները, քաղաքային երգերն ու ասմունքը համեմվում էր Երևանից ՀՀ ժողովրդական արտիստներ Ռուբեն Մաթևոսյանի և Ջիվան Գասպարյանի՝ Գլախո Զաքարյանի մասին խոսքի ձայնագրություններով: Ուշագրավ էր սովորական վրացի քաղաքացու՝ Թեմուր Ջալաղոնիայի սրտառուչ խոսքը, որը խոնարհում էր Գլախո Զաքարյան տաղանդի և հայ-վրացական դարավոր բարեկամության առջև:

Հնչեցին բանաստեղծ, թարգմանիչ Գիվի Շահնազարի հուշերը, ՀՀ Ազգային ժողովի անդամ Տաճատ Վարդապետյանի՝ թբիլիսահայ արվեստի մեծարման խոսքը և մայրենին պահելու պատգամը, ՀՀ արդարադատության նախարար Հովհաննես Մանուկյանի գնահատականը Գլախո Զաքարյանին՝ որպես երկու քաղաքների բարեկամությունը կամրջող երգչի և մաղթանքը, որ «Գլախո-երկրորդ կյանք» վերտառությամբ տեսաերիզը սերունդների համար դառնա Գլախո Զաքարյանի ֆենոմենի բացահայտում:

Երգչի դուստր Ժասմինա Մդիվանին իր երախտագիտությունն ուղղեց ՀՀ Արդարադատության նախարարին, Վրաստանում ՀՀ դեսպանին, դեսպանության աշխատակից Միքայել Ավագյանին, Վիրահայոց Թեմին և «Հայարտուն» կենտրոնին, բոլոր աջակցողներին՝ տեսաերիզը թողարկելու և երեկոն բարձր մակարդակով կազմակերպելու համար:

Թբիլիսիի Սակրեբուլոյի անդամ Ալեկո Էլիսաշվիլին, բարձր գնահատեով Թբիլիսիի մշակույթի զարգացման գործում անմահ Գլախո Զաքարյանի ներդրումը, հայտարարեց, որ քաղաքի Սակրեբուլոն պատրաստ է ընտանիքի համաձայնության դեպքում, կազմակերպել և իրականացնել Գլախո Զաքարյանի վերաթաղումը Խոջիվանքի հայ գրողների և հասարակական գործիչների պանթենում:

Հավարտ միջոցառման իր օրհնությունը հղելով ներկաներին, գնահատանքի խոսքում Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը Վիրահայոց Թեմի և Վրաստանում ՀՀ դեսպանության համագործակցությունը անվանեց շարունակական, բարձրաձայնելով համագործակցության նորանոր ծրագրերը, որոնք կոչված են հայ-վրացական բարեկամության խորացմանը, Վրաստանում հայ մշակույթի զարգացմանը:

Հընթացս միջոցառման ՀՀ Սփյուռքի նախարարության ԱՊՀ երկրների հայ համայնքների վարչության Կովկասյան տարածաշրջանի բաժնի պետ Տարոն Շագոյանը Վրաստանի հայ մտավորականների միության նախագահ Ենոք Թադևոսյանին փոխանցեց ՀՀ Սփյուռքի նախարարության «Մայրենիի դեսպան» մեդալը: Երեկոն հայերեն և վրացերեն լեզուներով վարում էին ՀՀ Արդարադատության նախարարության մամլո ծառայության ղեկավար Ծովինար Խաչատրյանը և Վիրահայոց թեմի առաջնորդարանի սոցիալական հարցերի ծառայության ղեկավար Միքայել Ավագյանը: Վերջում երեկոյի բոլոր մասնակիցները ստացան «Գլախո՝ երկրորդ կյանք» տեսաերիզը: