Վրաստանի վաստակավոր արտիստուհի, երգահան Նունու Գաբունիայի հետ հայ երաժշտասեր հասարակայնության հանդիպումը դարձավ Վիրահայոց թեմ «Հայարտուն» կենտրոնի հերթական մշակութային միջոցառումը, որը նախաձեռնել էր «Հայարտուն» կենտրոնը: Հանդիպումը կայացավ հունիսի 26-ին, ներկա էին ճանաչված երգահանի սաները,նրանց ծնողները, հյուրեր, հայ և վրացի երաժշտասեր հասարակայնության ներկայացուցիչներ: Միջոցառման վարող Աննա Պողոսովան ներկայացրեց ճանաչված երգահանի համառոտ կենսագրությունը, նրա ստեղծագործությունը՝ հայտնի երգերը, մանկական գործերը,կինոյի և անիմացիոն ֆիլմերի համար գրված երաժշտությունը: Արժեվորվեց Վրաստանի մշակույթի և հուշարձանների պահպանության նախարարության նախաձեռնությամբ, 2012 թվականի նոյեմբերին Թբիլիսիի համերգային դահլիճի առջև բացված Վրաստանի վաստակավոր արտիստուհի, Թբիլիսիի պատվավոր քաղաքացի Նունու Գաբունիայի աստղը:

Հանրաճանաչ երգահանը շնորհակալության խոսքեր ուղղելով «Հայարտուն» կենտրոնի համակարգող Լևոն Չիդիլյանին և գեղարվեստական ղեկավար Պավել Օգանեզովին՝ հայ երաժշտասեր հասարակայնության հետ այս հանդիպման համար, պատմեց հայ ժողովրդի, Հայաստանի երաժշտասեր հասարակայնության հետ իր կապերի մասին: Նա կարևորեց այն բարեկամական հարաբերությունները, որ այսօր էլ շարունակվում են փոխադարձ սիրով և նվիրվածությամբ: Խոսեց հայ երգարվեստին իր մոտեցման մասին, ընդգծելով, Երևանում իր սաների մասնակցությունը տարբեր երաժշտական մրցույթների, իր ներկայությունը մրցատյանի կազմում: Երգահան Գաբունիան կարևորեց սաներին հայերեն երգի կատարումը անպայման սովորեցնելու իր նախապատվությունը:

Այնուհետև հնչեցին երգեր Նունու Գաբունիայի և ուրիշ երգահանների երգացանկից: Ներկաների առանձնահատուկ ընդունելությանը արժանացան բազմաթիվ մրցույթների դափնեկիր Լիզա Կրասնոռուդսկայայի կողմից դասական և էստրադային, վրացերեն, ռուսերեն, հայերեն և այլ լեզուներով երգերի հիանալի կատարումները:

Հուզառատ և գեղեցիկ կատարմամբ հանդես եկավ հանրաճանաչ երգահանի թոռնուհին՝ Նինուցա Բեդիաշվիլին: Բարեկամության շնչով միջոցառումը հագեցած էր նաև հայերեն երգերով, որոնք հնչեցին մենակատարներ Անի Ղուշչյանի և Աննա Պողոսովայի կատարմամբ:

Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը, իր օրհնությունը հղելով ներկաներին, բարձր գնահատեց երգահան Նունու Գաբունիայի և նրա սաների մասնակցությամբ կայացած գողտրիկ երեկոն և այն անվանեց հայ-վրացական մշակութային բարեկամության ևս մեկ էջ: Նա գոհունակություն արտահայտեց «Հայարտուն» կենտրոնի ղեկավարության՝ երկու դրկից ժողովուրդների մշակույթները միմյանց մերձեցնելուն միտված գործունեության կապակցությամբ:

Երեկոն անցավ ջերմ, բարեկամական մթնոլորտում: