Վիրահայոց թեմի «Հայարտուն» կենտրոնում հերթական ամանորյա տոնական միջոցառումն էր: Կենտրոնի «Ներսես Շնորհալի» պատանեկան համույթը դեկտեմբերի 26-ին ներկայացավ հաշվետու համերգով:

Համույթը կազմավորվել է «Հայարտուն» կենտրոնի բացման հետ միասին: Վաստակաշատ խմբավար Մարիա Աբուլյանի հմուտ ղեկավարությամբ և դաշնակահար Կարեն Միրզոյանի նվագակցությամբ, 8-15 տարեկան պարմաններն ու պարմանուհիները սովորում են մեր դասական և ժողովրդական երգերը, տիրապետում կատարողական արվեստի նրբություններին և շնորհալիորեն ներկայացնում հայ խմբային երգը տարբեր բեմահարթակներում ինչպես Թբիլիսիում, այնպես էլ Հայաստանի Հանրապետությունում:

Ընդամենը երեք ամիս առաջ ներսեսշնորհալցիները հաջողությամբ մասնակցեցին Երևանում անցկացված «Վարդապետ Կոմիտաս» փառատոնին, արժանանալով փառատոնի գալա համերգին, տաղանդավոր խմբավար Հովհաննես Չեքիջյանի ղեկավարությամբ, ընդհանուր երգչախմբի կազմում երգելու պատվին: Իսկ հաշվետու համերգը դարձավ նրանց ամանորյա նվերը հանդիսատեսին:

Համերգին ներկա էին Թեմի հոգևոր դասը, Հոգաբարձուների խորհրդի անդամները, Թեմի և «Հայարտուն» կենտրոնի պաշտոնեությունը, խմբակների ուսուցիչներ, ծնողներ, հյուրեր, որոնց թվում էր Վրաստանում լրատվամիջոցների զարգացման հիմնադրամի վարչության նախագահ Թամար Կինծուրաշվիլին և ոււրիշներ:

Կոմիտասի «Նազանի» երգի գեղեցիկ կատարմամբ պատանիներին ողջունեց և ոգեշնչեց կենտրոնի «Ներսես Շնորհալի» ավագների երգչախումբը երիտասարդ երաժիշտ Հովհաննես Համբարձումյանի գլխավորությամբ:

Այնուհետև իրար հաջորդեցին Կոմիտասի, Սայաթ-Նովայի, Ռոբերտ Ամիրխանյանի, Ռևազ Լաղիձեի և այլոց ստեղծագործությունները և ժողովրդական այլ երգեր: Երգչախմբի անդամների և մենակատարներ Գիորգի Մաիլյանի ու Էդուարդ Ղուշչյանի գեղեցիկ կատարումները դարձան շնորհաշատ խմբի կատարողական արվեստի գեղեցիկ վկայություն: Համերգն ուղեկցվում էր «Ներսես Շնորհալի» պատանեկան երգչախմբի անցած ուղու, ելույթների և հաջողությունների մասին թեմի մշակույթի բաժնի պատասխանատու Լևոն Չիդիլյանի մեկնաբանություններով:

Համերգի վերջում, ներկաներին իր օրհնությունը հղեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Թեմակալ առաջնորդը գնահատանքի իր խոսքում արժևորեց արվեստի և մշակույթի դերը ազգապահպանության գործում, ընդգծելով հռչակավոր երգահանների գործերի հետ միասին հայ դասականների և ժողովրդական ստեղծագործություններին տիրապետելու անհրաժեշտությունը: «Այս երգերով կրթվում և դաստիարակվում է մարդը, նրա մեջ ձևավորվում է նվիրյալ քրիստոնյան և իսկական հայորդին- եզրափակեց Սրբազան Հայրը:

Միջոցառման վերջում համույթի անդամներին բաժանվեցին ամանորյա նվերներ: