Ընթացիկ տարվա օգոստոսի 30-ին, Վրաստանի Ծերովանի քաղաքամերձ ավանում կայացավ Վիրահայոց թեմի քահանայից և պաշտոնեության համատեղ ժողովը: Թեմակալ առաջնորդ Գերաշնորհ Տեր Վազգեն եպիսկոպոս Միրզախանյանի աղոթքով և օրհնության խոսքով բացվեց ժողովը և օրակարգի հաստատումից հետո ատենապետությունը ստանձնեց Սամցխե – Ջավախքի Ընդհանուր առաջնորդական փոխանորդ Տեր Բաբգէն աբեղա Սալբիյանը:

Ժողովին իրենց ներկայությունն էին բերել Թբիլիսիի, Բաթումի, Սամցխե-Ջավախքի և Քվեմո Քարթլիի հայ համայնքների հոգևոր հովիվները, Սամցխե-Ջավախքի ընդհանուր փոխառաջնորդության պաշտոնեությունը և աշխատակիցները:

Թբիլիսիի, Բաթումի, Սամցխե-Ջավախքի և Քվեմո Քարթլիի հայ համայնքների հոգևոր հովիվների առաքելությունն է հովվել հատկացված համայնքները, հետևել տեղում վերականգնվող եկեղեցիների շինաշխատանքներին, կազմակերպել բազմաբնույթ միջոցառումներ ժողովրդին եկեղեցուն մերձեցնելու, երիտասարդությանը Աստծու տան շուջը համախմբելու ուղղությամբ, Վիրահայոց թեմի բոլոր հովվություններում անվերապահորեն պահպանել եկեղեցական արարողությունների հաստատված կարգը: Խորհրդակատարությունները, ժամակարգությունները և ծեսը կատարել միօրինակությամբ՝ հարազատ Եկեղեցու կանոններին: Իր հովվական գործունեության մեջ հոգևոր հայրը պետք է հանդիսանա տեղի բնակչության հոգևոր և ազգային լուսավորիչը, ինչպես նաև լրատվության միջոցները ավետարանական պատգամների համար օգտագործողը:

Սրբազան Հայրը կարևորեց և անհրաժեշտ համարեց հոգևոր-եկեղեցական և կրթա-մշակութային աշխատանքների աշխուժացումը Սամցխե-Ջավախքի և Ծալկայի առաջնորդական փոխանորդություններում և համապատասխան ցուցումներ տվեց տեղում ծառայող հոգևոր սպասավորներին և փոխառաջնորդության պաշտոնեությանը: Սրբազանը գոհունակություն արտահայտնեց Բաբգէն վարդապետի կատարած աշխատանքների համար և պատրաստակամություն հայտնեց առաջնորդարանի ողջ հնարավորություններով աջակցել Հայր Սուրբի կողմից տարածաշրջանում իրականացվող բազմաբնույթ ծրագրերին:

Վիրահայոց Թեմի առաջնորդը գնահատելով հոգևոր դասի գործունեությունը, հորդորեց շարունակել Տիրոջը ծառայելու բարի առաքելությունը:

Թեմի առաջնորդը ներկայացրեց թեմի կառավարման կառուցվածքում մտցված փոփոխությունները, մանրամասնորեն խոսեց նոր կառավարման համակարգով ստեղծված յուրաքանչյուր բաժնի շուրջը: Դրանք են իրավաբանական հարցերով, պետության հետ հարաբերությունների և միջկրոնական համագործակցության, մշակույթի, կրթության, երիտասարդության հարցերով, մամլո և լրատվության, վարչա-տնտեսական և ֆինանսական բաժինները:

Հընթացս ժողովի ելույթ ունեցան բաժինների ղեկավարները: Իրավաբանական հարցերով, պետության հետ հարաբերությունների և միջկրոնական համագործակցության բաժնի տնօրեն Լևոն Իսախանյանը խոսեց գործող 47 եկեղեցիները, Առաջնորդարանը և «Հայարտուն» կենտրոնը Թեմի հաշվեկշռին գրանցելու, ինչպես նաև Վրաստանի հայ ազգաբնակչության հաշվառքի մասին: Նույն բաժնի սոցիալական ծառայության ղեկավար Միքայել Ավագյանը, խոսելով Տեր Հուսիկ քահանա Հարությունյանի հետ կալանավայրերում հայազգի բանտարկյալներին այցելությունների մասին, առաջարկեց այցելությունների ցուցակում ընդգրկել նաև տարածաշրջանների համայնքներից կալանավայրերում գտնվողներին, ինչպես նաև Թբիլիսիի և մյուս հայաբնակ շրջանների բնակչության բուժստուգման բարեգործական գործողություն կազմակերպելու մասին:

Մշակույթի բաժինը, տնօրեն և «Հայարտուն» կենտրոնի համակարգող Լևոն Չիդիլյանի գլխավորությամբ, անցած վեց ամիսների ընթացքում իրականացրել է 50 միջոցառում: Կենտրոնում գործում են պարային համույթներ և երգչախմբեր, վոկալ-գործիքային համույթ, դուդուկի, դհոլի, շախմատի, ֆուտբոլի խմբակներ: Բաժինը մասնակցել է բազմաթիվ փառատոների մայր հայրենիքում և Վրաստանում: Բաժնի պատասխանատուն խոսեց այն մասին, որ ՀՀ մշակույթի և Սփյուռքի նախարարությունների, Գ.Գյուլբենկյան հիմնադրամի և հոգաբարձուների խորհրդի նյութական միջոցներով շարունակվում են թեմում տարվող մշակութային գործերը: Լ.Չիդիլյանն առաջարկեց շարունակական դարձնել տարածաշրջաններում հոգևոր-մշակութային միջոցառումները, օժանդակել տեղերում մշակութային խմբեր և արվեստի կենտրոններ ստեղծելու գործին:

Իսկ մշակույթի բաժնի գեղարվեստական մասի, ստեղծագործական խմբակների և երաժշտական և տեխ.սպասարկման ղեկավար Պավել Օգանեզովը ներկայացրեց մշակութսյին բաժնի նոր նախագծերը և առաջիկա ծրագրերը:

Կրթության բաժնի տնօրեն Եվգենյա Մարկոսյանը խոսեց Թբիլիսիում, Բաթումիում և Քոբուլեթիում մեկօրյա դպրոցների և տեղերում տարվող կրթա-մշակութային աշխատանքների արդյունավետության մասին, առաջարկեց վերապատրաստման դասընթացներին ընդգրկել տարածաշրջանների ուսուցիչներին և աջակցել նախակրթարաններ բացելու հայրենանվեր գործին: Խոսեց նաև «Հայարտուն» կենտրոնի նախակրթարանի գործունեությունը ընդլայնելու և Թբիլիսիի հանրակրթական դպրոցների հետ համագործակցություն ծավալելու մասին: Տնօրենի կողմից բարձրացվեց Վրաստանի գործող հայկական դպրոցներում ֆակուլտատիվ եղանակով Հայ ժողովրդի պատմություն առարկայի դասավանդման հարցը: Նա նաև զեկուցեց կիրակնօրյա դպրոցների և նախակրթարանի աշակերտության համար ՀՀ կրթության նախարարությունից ստացված համապատասխան քանակության գրականության մասին:

Երիտասարդական բաժնի տնօրեն, «Հայարտուն» կենտրոնի հոգևոր տեսուչ Գևորգ սարկավագ Անտոնյանը խոսեց լավ երիտասարդ դաստիարակելու համար նրան եկեղեցուն մերձեցնելու կարևորությունը: Առաջարկեց հանդիպումների, անձնական շփումների և զրույցների, ուխտագնացությունների միջոցով հասնել երիտասարդներին եկեղեցու շուրջը համախմբելու գործի իրականացմանը: Գևորգ սարկավագն իր հերթին բարձր գնահատեց ՀՀ սպորտի և երիտասարդության հարցերով նախարարության հետ համագործակցությունը և ստանձնեց Թբիլիսիի հայ գրողների և հասարակական գործիչների Խոջիվանքի պանթեոնի պահպանության և խնամքի պատասխանատվությունը:

Մամլո և լրատվական գործունեության մասին խոսելով, բաժնի տնօրեն Սուսաննա Խաչատրյանը այն անվանեց թեմի գործունեության հայելի, որի միջոցով ակնհայտ է դառնում ողջ աշխատանքը: Թեմի կայք-էջը, որտեղ զետեղված նյութերը չորս լեզուներով են՝ հասանելի է դարձնում լուրերը, Եկեղեցու խորհուրդները, հոգևոր հովիվների կենսագրությունները, պատմական և գործող եկեղեցիների պատմությունը, նախագծվում են ռադիո և հեռուստահաղորդումների պատրաստում:

Էլեկտրոնային լրատվության ծառայության ղեկավար Վալերի Բադալյանը տեղեկացրեց, որ պայմանավորվածություն է ձեռք բերվել ընկերություններից մեկի հետ և այսուհետ Թեմը հնարավորություն ունի էլեկտրոնային փոստով ավելի շատ նյութեր ուղարկել հասցետերերին և ներկայացրեց հեռուստահաղորդումներ կազմակերպելու համար պահանջվող տեխնիկայի անհրաժեշտությունը:

Ելնելով թեմի կառավարման կառուցվածքում մտցված փոփոխություններից, Թեմի ֆինանսական գծով տնօրեն Մարգարիտ Կիրակոսյանը հանգամանալից բանախոսեց ըստ բաժինների ֆինանսական մուտքերի և ելքերի մասին, հավելելով նպատակային նախագծերի վրա աշխատանքը և հաշվետվությունները:

Իսկ վարչա-տնտեսական բաժնի ղեկավար Կարեն Երիցյանը ներկայացրեց Սուրբ Գևորգ առաջնորդանիստ եկեղեցու վերանորոգման ընթացքը, ինչպես նաև Շահումյան ավանի «Սուրբ Աստվածածին» եկեղեցու շինարարության աշխատանքները, տեղեկացնելով, որ արդեն ավարտվել են Փոքր Դաղեթ գյուղի Սուրբ Աստվածածին եկեղեցու վերականգնողական աշխատանքները և սեպտեմբերի 8-ին տեղի է ունենալու եկեղեցու վերաօծումը:

Վիրահայոց թեմի բաժինների պատասխանատուները պատասխանեցին հոգևորականներին հետաքրքրող հարցերին:

Ժողովին ներկա էին թեմի հետ աշխատող ստեղծագործական միությունների ղեկավարները. Վրաստանի հայ գրողների «Վերնատուն» միության նախագահ Ժորա Սնխչյանը, Վրաստանի հայ մտավորականների միության նախագահի պաշտոնակատար Ենոք Թադևոսյանը, Վրաստանի հայ նկարիչների միության նախագահ Մերուժան Շահումյանը, Վրաստանի հայ կանանց «Շուշանիկ» միության նախագահ Սուսաննա Խաչատրյանը, Վրաստանի հայ երաժիշտների միության նախագահ Արտեմ Կիրակոզովը: Հարգելի պատճառով բացակայում էր Գարի Դավթյան տիկնիկային մշակույթի տան տիրուհի Ժաննա Դավթյանը:

Ստեղծագործական միությունների ղեկավարները իրենց ելույթներում արժևորեցին եկեղեցու օժանդակությունը միությունների աշխատանքին, կարևորեցին վրացական համանուն կազմակերպությունների և անհատների հետ համատեղ միջոցառումների իրականացումը: Առաջարկվեց շարունակել շրջաններում միջոցառումների անցկացումը, որտեղ գործնական աշխատանքներ կիրականացվեն հոգևոր հովվությունների հետ:

Հոգևոր դասի և պաշտոնեության համատեղ ժողովի աշխատանքն ամփոփեց և տեղի հոգևորականներին համապատասխան պատգամներ տվեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը:

Ժողովը փակվեց միասնական աղոթքով: