|
Լուրեր
|
|
 2018 թվականի հուլիսի 5-ից SOAR բարեգործական հիմնադրամի հատկացրած միջոցներով, Վիրահայոց թեմի «Ռաֆայել Ջավախ» կենտրոնում գործում էր «Առավոտ լուսո» մանկական բակային ճամբարը: Ճամբարն իր գործունեությունը ծավալել էր տեղի Սուրբ Սարգիս եկեղեցու հովանու ներքո և ամենօրյա էր 21 օրվա ընթացքում ընդունում էր 60 երեխայի:
Դաստիարակչուհիները, սպասարկող անձնակազմը անում էին ամեն ինչ՝ երեխաների ամառային հանգիստը հագեցած և զվարճալի դարձնելու համար: Հետաքրքիր էր անցնում կյանքը բակային ճամբարում. զրույցներ քրիստոնեական դաստիարակության ուղղությամբ, աղոթքների սերտում, երգ ու պարի, բանաստեղծությունների ուսուցում, սպորտային, ինտելեկտուալ խաղեր և մրցումներ, իսկ կեսօրյա ճաշից հետո ամփոփվում էր սովորածը և ծրագրվում նոր երգերի, պարերի, ոտանավորների ուսուցումը:
Հուլիսի վերջերին Նինոծմինդայի հոգևոր հովիվ Տեր Արմաշ քահանա Պողոսյանի և Ռաֆայել Ջավախ կենտրոնի ղեկավար Ժորա Սնխչյանի ընկերակցությամբ, «Առավոտ լուսո» բակային ճամբարի սաներին հանդիպեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Նինոծմինդայի Սուրբ Սարգիս եկեղեցում Թեմակալ առաջնորդը ճամբարականների հետ մասնակցեց աղոթքի, որից հետո զրուցեց նրանց հետ, հետաքրքրվեց ճամբարային առօրյայով և մաղթեց ուրախ ու հետաքրքիր հանգիստ: Վիրահայոց թեմի առաջնորդը զրույցներ ունեցավ նաև բակային ճամբարի կազմակերպիչների և ղեկավարների հետ:
|
