Հարիսայի փառաատոնը օր-օրի ընդարձակում է իր շրջանակները: Գյուղերի և ավանների բնակիչները մեծ խանդավառությամբ և ոգևորությամբ են ընդգրկվում հարիսայի շաբաթին, փառատոնը դարձնելով իրավամբ ժողովրդական տոն:

Փետրվարի 6-ին հայկական ազգային կերակրատեսակի՝ հարիսայի փառատոնին, որը վիրահայոց թեմի և Վրաստանի հայ կանանց «Շուշանիկ» միության նախաձեռնությամբ արդեն մի քանի անգամ անցկացվել է քաղաքամայր Թբիլիսիում, ընդգրկվեց նաև Նինոծմինդայի շրջանը:

Հարիսայի փառատոններ կազմակերպվեցին Ջիգրաշենում և Մազարայում: Եկեղեցիների խաչի քավորներ Մնացական Կարապետյանը և Գարեգին Մանուկյանը առաջին նախակարապետները դարձան հրաշալի ազգային տոնախմբության՝ իրենց ընտանիքներում հարիսա պատրաստելով և տոնի մասնակիցներին հյուրասիրելով:

Տոնախմբության ընթացքում Տեր Արմաշ քհն Պողոսյանը օրհնեց ներկաներին, հարիսան, պատմեց ծիսակատարության մասին, իսկ քավորները բաժանեցին ուտեստը:

Հանդիսույթը իրենց ելույթով զարդարեցին «Նաիրի» պարային համույթի անդամները (պարուսույց՝ Լուսինե Մզիկյան), երկու գյուղերի երիտասարդները:

Բարեկենդանը, Հայ Առաքելական Եկեղեցու շարժական տոներից է, նշվում է Մեծ պահոց քառասնօրյա շրջանին նախորդող կիրակի օրը։ Փետրվարի 11-ին, Բուն Բարեկենդանին, փառատոնի կիզակետը կտեղափոխվի քաղաքի Ռաֆայել Ջավախ կրթամշակութային կենտրոն, որի հարիսայի փառատոնը կլինի ամփոփիչը շրջանում: