2018 թվականի հունվարի 6-ին Հայ Առաքելական Սուրբ Եկեղեցին նշեց Մեր Տեր Հիսուս Քրիստոսի Սուրբ Ծնունդը և Աստվածահայտնությունը: Առաջին տաղավար տոնը Սուրբ և Անմահ Պատարագով նշվեց Մայր Աթոռ Սուրբ Էջմիածնում, աշխարհասփյուռ հայության Սուրբ տաճարներում, ընդորում Վիրահայոց Թեմի եկեղեցիներում:

Վաղ առավոտից հավատացյալները ընտանիքներով, տոնական բարձր տրամադրությամբ շտապում էին Հայոց Եկեղեցի՝ ներկա գտնվելու Սուրբ Ծննդյան տոնական Պատարագին:

Դեռևս առավոտյան Ախալքալաքից ուղիղ հեռարձակմամբ Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը հայ հավատացյալներին շնորհավորեց Հիսուս Քրիստոսի ծննդյան լույս տոնի ավետիսով, որից հետո Թեմակալ առաջնորդը տոնական Սուրբ և Անմահ Պատարագ մատուցեց Վիրահայոց թեմի Սամցխե-Ջավախքի ընդհանուր առաջնորդական փոխանորդության Ախալքալաքի Սուրբ խաչ եկեղեցում:Տոնական Պատարագին ներկա էին Վրաստանի խորհրդարանի պատգամավոր Սամվել Մանուկյանը, Շրջանային ժողովի նախագահ Նաիրի Իրիցյանը, Ախալքալաքի քաղաքապետ Յուրիկ Ունանյանը:

Հընթացս Սբ. Պատարագի Վիրահայոց Թեմի առաջնորդը ընթերցեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի պատգամը Սուրբ Ծննդյան և Աստվածահայտնության տոնի առիթով: Եկեղեցում տարածվեց Մանուկ Հիսուսի ծննդյան և Աստվածահայտնության ավետիսը:

Սբ. Պատարագի վերջում Վազգեն Սրբազանի հանդիսապետությամբ կատարվեց Ջրօրհնեքի արարողություն և Եկեղեցու Խաչի կնքահայր դարձավ արժանավոր հայորդի Մատթևոս Վարդանյանը:

Թեմակալ առաջնորդն իր ձայնը միացնելով Ն.Ս.Օ.Տ.Տ. Գարեգին Բ Ամենայն Հայոց կաթողիկոսի շնորհավորանքին, իր բարեմաղթանքները հղեց հավատացյալներին: Հաշվի առնելով, որ այս գիշեր Վրաց Ուղղափառ Եկեղեցում տեղի է ունենալու Սուրբծննդյան տոնակատարություն, Սրբազան Հայրը հանուն Վրաստանի հայ հավատացյալների և հոգևոր դասի շնորհավորեց Վրաց Եկեղեցու հավատացյալներին և հոգևորականներին Քրիստոնեական այս մեծ տոնի առիթով:

Պատարագից հետո Սամցխե-Ջավախքի ընդհանուր առաջնորդական փոխանորդության Ախալքալաքի նստավայրում տեղի ունեցավ ընդունելություն:

Ետպատարագի ավանդության համաձայն, Ախալքալաքի Սուրբ խաչ եկեղեցու դպիրները այցելեցին Ծաղկավանք խոնարհված եկեղեցի և ընկղմվեցին այդ սրբավայրի ավերակներից բխող աղբյուրի ջրերից գոյացած փոքրիկ լճակի մեջ:

Տոնական տրամադրություն էր տիրում նաև Թբիլիսիի առաջնորդանիստ Սուրբ Գևորգ եկեղեցում: Մարդաշատ եկեղեցին լեփ-լեցուն էր հավատացյալներով:

Իրենց պատվավոր ներկայությունն էին բերել Վրաստանում ՀՀ արտակարգ և լիազոր դեսպան պարոն Ռուբեն Սադոյանը, դիսպանության դիվանագետները:

Սուրբ Ծննդյան տոնի առիթով Վիրահայոց թեմին շնորհավորելու էին եկել Վրաստանի խորհրդարանի պատգամավորներ Դավիթ Ճիճինաձեն և Ռուսլան Պողոսյանը, Հաշտության և քաղաքացիական ինտեգրման պետնախարար Քեթևան Ցիխելաշվիլին, Կրոնի հարցերով պետական գործակալության նախագահ Զազա Վաշախմաձեն, Ժողովրդական պաշտպանի գրասենյակի ներկայացուցիչներ Կոբա Չոփլիանին, Իզաբելլա Օսիպովան, Ազգային շարժում կուսակցության անդամներ Զաալ Ուդումաշվիլին, Խատիա Դեկանոիձեն, Զազա Բիբիլաշվիլին,բանաստեղծ-թարգմանիչ Գիվի Շահնազարը,ՄԱԿ-ում Վրաստանի երիտասարդության ներկայացուցիչ Գիորգի Թումասյանը, «Վրաստան» թերթի խմբագիր Վան Բայբուրթյանը և ուրիշներ:

Եկեղեցական արարողությանը ներկա էին համայնքային գործիչներ, մտավորականներ, վիրահայ համայնքի արժանավոր հայորդիներ:

Սուրբծննդյան տոնը հավուր պատշաճի նշվեց նաև Վիրահայոց թեմի Բաթումի Սուրբ Փրկիչ Եկեղեցում: Սուրբծննդյան տոնական պաատարագին ներկա գտնվեցին և հավատացյալներին Սուրբ Ծննդյան տոնի կապակցությամբ շնորհավորեցին Բաթումիի քաղաքապետ Լաշա Կոմախիձեն և Աջարիայի Ինքնվար Հանրապետությունում ՀՀ Գլխավոր հյուպաատոս Եղիշե Սարգսյանը: Սուրբ Պատարագը և բարձրաստիճան հյուրերի շնորհավորանքը հեռարձակվեց «Աջարիա» հեռուստաընկերությամբ:

Վրաստանի հայ հավատացյալներին Սուրբծննդյան և Աստվածահայտնության տոնի առիթով շնորհավորել էին Համայն Վրաստանի կաթողիկոս-պատրիարք Սրբազնագույն և Երանաշնորհ Իլիա Երկրորդը, Վրաստանի նախագահ Գիորգի Մարգվելաշվիլին և վարչապետ Գիորգի Կվիրիկաշվիլին:

Տոնական տրամադրությամբ և սուրբ մյուռոնով օրհնված ջրով ներկաները վերադարձան իրենց տները:

Հատկանշական է, որ առաջին անգամ Վրաստանի Հանրային ալիքի եթերով, ուղիղ միացում կատարվեց ինչպես Ախալքալաքի Սուրբ Խաչ, այնպես էլ Թբիլիսիի Սուրբ Գևորգ առաջնորդանիստ եկեղեցիներից և երկրով մեկ հեռարձակվեց Հայոց Եկեղեցու Սուրբծննդյան Սուրբ Պատարագը:

Վիրահայոց թեմում Սուրբծննդյան տոնակատարությունը լուսաբանվեց վրացական տարբեր լրատվամիջոցներով: