Վիրահայոց թեմի երիտասարդության հարցերի բաժինը (տնօրեն՝ Վալերի Բադալյան) նախորդ տարիների նման, մեծ ակտիվությամբ մասնակցեց ՀՀ Սփյուռքի նախարարության Սփյուռքի երիտասարդների հայրենաճանաչության 2017 թվականի «Արի տուն» ծրագրին: Հունիսի 25-ից առ օգոստոսի 5-ը Վիրահայոց թեմի 96 ակտիվ երիտասարդներ (Թբիլիսիից 60, Մառնեուլիի շրջանից 20, Բոլնիսի շրջանից 16 երիտասարդ) ընդգրկվեցին ծրագրի երեք փուլերին:

Ամառային հանգստի օրերը վիրահայ 13-18 տարեկան տղաներն ու աղջիկները առանձնահատուկ սիրով և մեծ հետաքրքրությամբ անցկացրեցին Մայր հայրենիքում, երկշաբաթյա տևողությամբ հյուրընկալվեցին հայաստանաբնակ ընտանիքներում, ծանոթացան Հայաստանի հոգևոր և մշակութային տեսարժան վայրերին, մտերմացան և կապեր հաստատեցին աշխարհասփյուռ հայության իրենց հասակակիցների հետ,Ծաղկաձորում մասնակցեցին ծրագրի ճամբարային փուլին, անմոռանալի երջանկություն ապրեցին խարույկի շուրջ: Նրանք Հայաստան էին մեկնում ոչ թե որպես պարզ զբոսաշրջիկներ, այլ իբրև ուխտավորներ:

Ժամանակին և լավ իրականացված նախապատրաստական-կազմակերպչական աշխատանքի արդյունքում, Վիրահայոց թեմը ներկայացնող խմբերը, նախորդ տարիների նման այս անգամ էլ աչքի ընկան բարձր կարգապահությամբ, ազգագրական մշակույթի, հոգևոր արժեքների իմացությամբ և օրինակելի վարքով: Հատկանշական է, որ մասնակիցների ներգրավումը ծրագրի փուլերին իրականացվում էր թեմի երիտասարդական բաժնի տնօրենի ներկայությամբ և անմիջական վերահսկողությամբ, մասնակիցների և նրանց ծնողների հետ տարած բացատրական աշխատանքով, հանդիպումներով և ժողովներով: Բաժնի տնօրենը չէր զլանում երկու շաբաթը մեկ նոր փուլի մասնակիցներին ուղեկցել Երևան և այցն ավարտած խմբին վերադարձնել իրենց տները: Ի պատասխան օրինակելի կարգապահության, տուն վերադարձի ճանապարհին երիտասարդների խմբերն այցելում էին տարբեր հոգևոր տաճարներ և մշակութային կոթողներ:

«Արի տուն» ծրագրի ղեկավարության կողմից արժևորվեց Վրաստանից ժամանած հայ երիտասարդների կազմակերպվածությունը և ծրագրի բոլոր միջոցառումներին երիտասարդների դրսևորած ակտիվությունը:

Մայր հայրենիքի կողմից սփյուռքահայ երիտասարդների նկատմամբ դրսևորված սերն ու ջերմությունը, ծանոթությունը Հայաստանի պատմությանը, մերձեցումը ազգային մշակույթին, հասարակական կյանքին, հոգևոր և ընտանեկան ավանդույթներին, նոր ընկերներն ու հաստատված մտերմական հարաբերությունները հայրենասիրության և ազգասիրության նոր լիցք առաջացրեցին երիտասարդների հոգում:

Վիրահայ երիտասարդները «Արի տուն» ծրագրից վերադարձան իրենց հետ բերելով ջերմ ու բարի հիշողություններ Հայաստանում անցկացրած ուրախ օրերից և երախտագիտության մեծ զգացում ՀՀ Սփյուռքի նախարարության հանդեպ՝ մայր հայրենիք այցելելու հնարավորություն ընձեռելու և «Արի տուն» ծրագիրը բարձր մակարդակով կազմակերպելու համար: