Թբիլիսահայ երիտասարդները, ովքեր համախմբված են Հայոց Եկեղեցու շուրջը, իրենց արմատներին մերձենալու նպատակով հաճախում են Վիրահայոց թեմի «Հայարտուն» կենտրոնում գործող մայրենիի ուսուցման մեկօրյա դպրոց, մասնակցում են երիտասարդական բաժնի տարբեր դասընթացներին և ծրագրերին, իհարկե շատ անգամ էին լսել տիկնիկագործ երջանկահիշատակ Գարի Դավթյանի և նրա տանը գործող տիկնիկային թատրոնի մասին, բայց մշակույթի հրաշալի այս տունը այցելելու և անձամբ տիկնիկների հետ շփվելու առիթ չէին ունեցել:

Եվ ահա 2017 թվականի հունիսի 28-ին Վիրահայոց թեմի երիտասարդական բաժնի նախաձեռնությամբ թբիլիսահայ երիտասարդ ակտիվիստների խումբը՝ բաժնի տնօրեն Վալերի Բադալյանի, ծրագրերի համակարգող Նինա Սերոպովայի և օպերատոր-լուսանկարիչ Գևորգ Պողոսովի ուղեկցությամբ, այցելեց «Գարի Դավթյան» մշակույթի տուն:

Տան տիրուհի Ժաննա Դավթյանը երիտասարդներին սիրով պատմեց վարպետ Գարիի մասին, ում հմուտ ձեռքերով «կյանք» է ներշնչվել «բարի,գեղեցիկ և խելացի» տիկնիկներին:

Անդրադարձ կատարելով 90-ական թվականների ծանր տարիներին, մութ ու լույսի մեջ տիկնիկային թատրոն ստեղծելու մտահղացմանը, տիկին Ժաննան կարևորեց մարդկանց ոգևորելու, բարություն ներշնչելու և նրանց մտահոգ դեմքերին տիկնիկների հիասքանչ խաղով մի փոքր ժպիտ շողշողացնելու իր ընտանիքի գաղափար-նպատակը: Հիրավի, ժողովրդական «Քաջ Նազար» հեքիաթի տիկնիկային բեմադրությունը, որը այնքան համահունչ էր ժամանակի շնչին, հանդիսատեսի կողմից ընդունվեց սիրով, ըմբռնումով և հիացմունքով:

Տիկնիկային թատրոնի գլխավոր խաղվարը երիտասարդներին ցուցադրեց հատվածներ Հագոյի, Անչափի և այլ կերպարներով տիկնիկների մասնակցությամբ: Երիտասարդների հիասքանչ տրամադրության գագաթնակետ դարձավ Հագոյի կերպարով տիկնիկի կողմից Լևոն Չիդիլյանի ընթերցմամբ Գևորգ Էմինի «Զարմանալի հայ» բանաստեղծության ասմունքը:

Երիտասարդները իրավամբ հիացած էին կոլորիտային այս տան թբիլիսյան ոգուց, բազմազգ շնչից, հրաշալի տիկնիկների խոսուն կերպարներից և տարածվող այն բարի, հավատքով հագեցած հայաշունչ մթնոլորտից, որ իր մեջ ներառնում էր հնամյա Հավլաբար թաղամասում կանաչ խոտերի ու ծաղիկների գրկում գտնվող այս գողտրիկ ու համեստ «Գարի Դավթյան» մշակույթի տունը:

Վիրահայոց թեմի երիտասարդական բաժինն իր խորին շնորհակալությունն է հայտնում մշակույթի տան տիրուհի Ժաննա Դավթյանին թբիլիսահայ երիտասարդների խմբին սիրալիր ընդունելու և տիկնիկագործ Գարի Դավթյանի վարպետությունը այդպես գեղեցիկ ներկայացնելու համար: