2017 թվականի մայիսի 25-ին,  Քրիստոնեական Սուրբ Եկեղեցին  նշեց  Հարությունից հետո Քրիստոսի 40 օր երկրի վրա  մնալու և  դեպի երկինք հրաշափառ Համբարձման տոնը:  Հայ Առաքելական  Սուրբ Եկեղեցու համար տոնը երկակի նշանակություն ունի, քանզի Համբարձման տոնի հետ միասին Հայոց Եկեղեցին նշում է 1441 թվականին Հայոց Հայրապետական Աթոռը՝ Սսից Վաղարշապատ փոխադրության հիշատակը:

Տոնը Վիրահայոց թեմի եկեղեցիներում նշվեց  Սուրբ և Անմահ Պատարագներով և ուխտագնացություններով:
Թբիլիսիի Սուրբ Էջմիածին եկեղեցում  հոգևոր հովիվ Տեր Վիրապ քահանա Ղազարյանը հընթացս Սուրբ Պատարագի քարոզ խոսեց Համբարձման տոնի խորհրդի և Սուրբ Էջմիածնի ուխտի օր հռչակելու մասին: Կատարվեց «Հայրապետական» մաղթանք, որի ժամանակ աղոթք բարձրացվեց Մայր Աթոռ Սուրբ Էջմիածնի անսասանության և հավերժության, ինչպես նաև Ամենայն Հայոց կաթողիկոսի արևշատության և անխռով գահակալության համար:
Սուրբ Պատարագի վերջում եկեղեցի մտան գույնզգուն ծաղկեպսակներով զուգված Թեմի Սուրբ Մովսես Խորենացի նախակրթարանի սաները, ի նշան տոնի նաև ժողովրդական ավանդույթի:  Արժանապատիվ Տեր  Վիրապ քահանան երեխաներին բացատրեց տոնի խորհուրդը, ժողովրդական  արարողությունները և մաղթեց նրանց մեր Տեր Հիսուս  Քրիստոսի օրհնությունը:  
Բաթումի Սուրբ Փրկիչ եկեղեցում Սուրբ  Պատարագից հետո, տոնը շարունակվեց  թեմի «Ալեքսանդր Մանթաշյանց» կենտրոնում: Գեղեցիկ տոնահանդեսը կենտրոնի տնօրեն Սոնա Հովհաննիսյանի  ղեկավարությամբ կազմակերպել էին «Աղբյուր» երգչախումբը և ասմունքի  խումբը՝ ուսուցիչներ Ռուզաննա Օվանեսյանի և Սաթենիկ Դանիելյանի գլխավորությամբ: Միջոցառման ավարտին գնահատանքի խոսքով եույթ ունեցան Աջարիայի Ինքնավար Հանրապետությունում ՀՀ գլխավոր հյուպատոս պարոն Եղիշե Սարգսյանը և   «Սուրբ Փրկիչ» եկեղեցու հոգևոր հովիվ արժանապատիվ Տեր Արարատ քահանա Գումբալյանը:
 Ախալքալաքի շրջանի Գումբուրդոյի նորաօծ Սուրբ Խաչ եկեղեցում, օրհնությամբ Սամցխե-Ջավախքի և Ծալկայի ընդհանուր առաջնորդական փոխանորդ Հոգեշնորհ Տեր Բաբգէն վարդապետ Սալբիյանի, արժանապատիվ Տեր Տաթև քահանա Մարուքյանը մատուցեց Համբարձման Սուրբ և Անմահ Պատարագ: Գյուղում հավաքված բազմաթիվ գումբուրդոցիներին Ախալքալաքից միացել էին Սուրբ Խաչ եկեղեցու ուխտավորներն ու կիրակնօրյա դպրոցի սաները։ Հավարտ Սուրբ Պատարագի՝  եկեղեցու բակում տեղի ունեցավ ժողովրդական հանդիսություն՝ Ջանգյուլումի արարողություն և մատաղի հյուրասիրություն՝ եկեղեցու բարերար Խաչատուր Սահարյանի կողմից:
Վիրահայոց թեմի առաջնորդարանի աջակցությամբ  Թբիլիսիի Սուրբ Էջմիածին եկեղեցուց կազմակերպվեց  ուխտագնացություն Մառնեուլի շրջանի Ախքյորփի գյուղ: Թբիլիսիից  ժամանած շուրջ երեք տասնյակ ուխտավորները միացան գյուղի 1861 թվականի կառույց  Սուրբ Աստվածածին  մատուռում   հավաքված տեղացիներին: Արժանապատիվ Տեր Մանուկ քահանան  մատուցեց Սուրբ և Անմահ Պատարագ: Հավատացյալները, որոնց շրջանում էին նաև բազում դպրոցականներ, մասնակցեցին խոստովանությանը և ստացան հաղորդություն:
Եկեղեցու մերձակա տարածքում կազմակերպվեց զվարճալի  ժողովրդական տոն:   Ուխտավորների և տեղացիների մասնակցությամբ կազմակերպվեցին տարբեր ազգային խաղեր,  հնչեցին երգեր:    
Համբարձմանը նվիրված Սուրբ Պատարագ մատուցվեց նաև Ախալցիխեի Սուրբ Գրիգոր Լուսավորիչ եկեղեցում, ուխտագնացություն կազմակերպվեց Նինոծմինդայի շրջանի Կաթնատուի Սուրբ Համբարձում մատուռ, իսկ Ծալկայի շրջանում  տոնը նշվեց ուխտագնացությամբ Ղզլքիլիսայի «Վանք» և կաթնապուրի հյուրասիրությամբ: