2016 թվականի հունիսի 28-ին, Բաթումի «Սուրբ Փրկիչ» եկեղեցի այցելեցին Արցախում և Հայաստանի Հանրապետության սահմանների պաշտպանության ժամանակ զոհված զինծառայողների մայրերը:

Եկեղեցու հոգևոր հովիվ արժանապատիվ Տեր Արարատ քահանա Գումբալյանը զոհված զինվորների հոգիների խաղաղության համար կատարեց հոգեհանգստյան կարգ: Տեր Հայրը մխիթարանքի խոսքեր ուղղելով որդեկորույս մայրերին, արժևորեց հայրենասիրության և նվիրվածության այն վեհ զգացումները, որ որդու մեջ կարող է ներդնել միայն մայրն իր սիրասուն զավակի դաստիարակության ընթացքում:

Որդեկորույս ուխտավորների հետ կայացավ հանդիպում Վիրահայոց թեմի Բաթումի «Ալեքսանդր Մանթաշով» կենտրոնում: Հանդիպմանը ներկա էին Աջարիայի Ինքնավար Հանրապետությունում ՀՀ Գլխավոր հյուպատոս, նորանշանակ Եղիշե Սարգսյանը, համայնքային գործիչներ, կենտրոնի աշխատակիցները:

Կենտրոնի տնօրեն Սոնա Հովհաննիսյանը բացելով հանդիպումը, շնորհակալություն հայտնեց զոհված զինծառայողների մայրերին հերոս որդիներ մեծացնելու, հայրենիքի անսասան պաշտպաններ դաստիարակելու համար: Այնուհետև ցուցադրվեց տեսահոլովակ՝ նվիրված Հայոց բանակին:

Երախտագիտության խոսքով հանդես եկան հյուպատոս Եղիշե Սարգսյանը և հոգևոր հովիվ Տեր Արարատ քահանա Գումբալյանը: Երկուստեք նշվեց, որ մայր հայրենիքն ու նրա սահմանները կյանքի գնով պաշտպանելու ամենազորեղ պատգամ երիտասարդներին կարող է լինել հերոսաբար զոհված զինծառայողների մայրերի քաջալերանքը:

Իրենց խոսքում զինծառայողների մայրերը, սրտում կրելով որդիների կորստյան ցավն ու կսկիծը, նշեցին, որ իրենք հպարտ են, որ իրենց զավակները զոհվել են հայրենիքի պաշտպանության համար: Շնորհակալություն հայտնելով իրենց զավակների հիշատակը պահելու համար, նրանք երիտասարդներին քաջալերեցին միշտ և ամենուրեք, թեկուզ կյանքի գնով պաշտպանել իրենց հայրենիքը, իրենց տունը, իրենց ծնողների պատիվը: