Ընթացիկ տարվա հուլիսի 8-ին, Վիրահայոց թեմի «Հայարտուն» կենտրոնի Գալուստ Գյուլբենկյյան սրահում, կայացավ Վիրահայ Գիտահետազոտական կենտրոնի հերթական հանդիպումը թբիլիսահայ հասարակայնության ներկայացուցիչների հետ:

Բացելով հանդիպումը, Վիրահայ գիտահետազոտական կենտրոնի նախագահ պրոֆեսոր Էմմա Ախտյանը, անդրադարձ կատարեց կենտրոնի 6-ամսյա աշխատանքներին, արձանագրեց գործունեության հիմնական ուղղություններըից ցեղասպանության, լեզվական, պատմական, գրական, թարգմանչական թեմաներով քննարկումները, դասախոսությունները և պարապմունքները: Այնուհետև խոսքը փոխանցեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանին, ով հրավիրված էր բանախոսելու Հայոց Եկեղեցու պատմության շուրջ:

Վազգեն Սրբազանի դասախոսությունը Հայոց Եկեղեցու կազմավորման, կառուցվածքի, անվանման շուրջ էր, շոշափվեցին նաև Հայ Առաքելական Ուղղափառ Սուրբ եկեղեցու և Վրաց Ուղղափառ Եկեղեցու նմանությունների և տարբերությունների, դարերի պատմություն ունեցող միջեկեղեցական հարաբերությունների, Հավատքի շուրջ ազգի համախմբման գործում Հայոց Եկեղեցու դերի և նշանակության հարցերը:

Գերաշնորհ Տեր Վազգեն եպիսկոպոս Միրզախանյանը պատասխանեց ներկաների հարցերին: Առաջարկություն արվեց նման հանդիպում-դասախոսությունները, հատկապես նվիրված հոգևոր կյանքին, դարձնել պարբերական: