«Այս երաժիշտ-երգահանի ստեղծագործությանը լավ ծանոթ են էստրադայի սիրահարները ոչ միայն Վրաստանում, այլև նրա սահմաններից դուրս, դե, ուրեմն եկեք մոտիկից ծանոթանանք նրա հետ...»,-   այսպիսի խոսքերով   Վրաստանի հայ երաժիշտների միության նախագահ Արտեմ Կիրակոզովը բացեց երաժիշտ և գործիքավորող Լևոն Շահբազյանի ստեղծագործական երեկոն, որը կայացավ հունվարի 26-ին Վիրահայոց Թեմի «Հայարտուն» մշակույթի կենտրոնի Գալուստ Գյուլբենկյան սրահում:

Լևոն Շահբազյանի շատ երգեր և գործիքավորումներ արժանի տեղ են զբաղեցնում հայտնի էստրադային երգիչների երգացանկում, դառնալով նրանց կատարողական արվեստի անբաժան ուղեկիցներ: Ահա արդեն 30 տարուց ավելի նա համագործակցում է հանրահայտ երգիչ և կինոդերասան Վախթանգ Կիկաբիձեի հետ և հանդիսանում է նրա կոնցերտմեյստրը և գործիքային անսամբլի ղեկավարը:

Երեկոյի վարող և միջոցառման կազմակերպիչներից մեկը՝ Վերոնիկա Իաշվիլի-Մանուկյանը, ներկայացնելով հարուստ ծրագրի հերթական համարները, ավելի ու ավելի էր ոգևորում շնորհալի երգահանի, վարպետ գործիքավորողի, վաստակաշատ երաժշտի արվեստով հիացած հանդիսատեսին:

Երեկոյին մասնակցեցին նաև պատանի ստեղծագործող Գրիգորի Շահբազյանը, ով կարողացավ զարմացնել բոլորին իր սքանչելի կոմպոզիցիայի սինթեզատորային վարպետ կատարմամբ, ճանաչված պարուհի և պարուսույց Սվետլանա Երիցյանը՝ գեղանազ պարով և էստրադային երգչուհի Աննա Պողոսովան հայ երգի գեղեցիկ կատարումով:  

Երեկոն ավարտվեց Լևոն Շահբազյանի կատարողական արվեստի հմայքը վերստին ըմբոշխնելու ակնկալիքով: