|
Լուրեր
|
|
2018 թվականի ապրիլի 15-ին տոնական տրամադրություն էր տիրում Վրաստանի Փոթի քաղաքում: Քաղաքը նշում էր իր օրը: Փոթին զարդարվել էր օրվան համապատասխան, իսկ նախաձեռնած միջոցառումները ընթանում էին «Փոթիի օրեր-2018» խորագրով, հիրավի բնակչության մոտ ստեղծելով ուրախ տրամադրություն և հպարտություն իրենց սիրելի քաղաքի նկատմամբ:
Քաղաքի օրվա տոնակատարությանը մասնակցեց նաև Վիրահայոց թեմի պատվիրակությունը, որի կազմում էին Աջարիայի, Գուրիայի և Իմերեթիի հայության հոգևոր հովիվ արժանապատիվ Տեր Արարատ քահանա Գումբալյանը, Թեմի իրավական հարցերի և համագործակցության բաժնի տնօրեն Միքայել Ավագյանը, Սուրբ Փրկիչ եկեղեցու իրավաբան Ժաննա Ավետիսովան և օպերատոր-լուսանկարիչ Սեյրան Բարոյանը:
Թեմի պատվիրակությունը ներկա գտնվեց Փոթիի Սուրբ Զատիկ առաջնորդանիստ եկեղեցում մատուցված Սուրբ Պատարագին և տոնական բոլոր միջոցառումներին:
Տոնին նվիրված հանդիսությանը ելույթ ունեցավ արժանապատիվ Տեր Արարատ քահանա Գումբալյանը: Վերջինս փոխանցեց Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի եղբայրական ողջույնը և շնորհավորանքները և նվիրեց ճանաչված նկարիչ Թենգիզ Միկոյանցի Թբիլիսյան պատկերով գեղանկարը:
Փոթի քաղաքի օրվան նվիրված տոնական միջոցառումներն ավարտվեցին կենտրոնական զբոսայգում կայացած համերգով:
|
